Almatyda bıyl 30 myń oqýshy 1-synypqa barady

ALMATY. QazAqparat – Jańa oqý jylynda 1-synypqa shamamen 30 myń oqýshy qabyldanady. Bul týraly Almaty ákimi Baqytjan Saǵyntaev tamyz keńesinde málim etti, dep habarlaıdy QazAqparat tilshisi.

«Almaty mektepteri postkovıdtik kezeńde: Bilim sapasy, balalardyń densaýlyǵy jáne otbasynyń róli» atty onlaın forým barysynda megapolıs ákimi Baqytjan Saǵyntaev jańa oqý jylynda qalanyń 287 mektebinde 300 myńǵa jýyq oqýshy bilim alatynyn aıtty. Birinshi synyptarǵa 30 myńnan astam bala barady.

Jańa oqý jyly qarsańyndaǵy mańyzdy mindetter – balalardy oqytý men tárbıeleý úshin qaýipsiz jáne jaıly jaǵdaılar jasaý, balalar men qyzmetkerlerdiń densaýlyǵyn qorǵaýdy qamtamasyz etý, oqytý-tárbıeleý protsessin sapaly uıymdastyrý, onyń ishinde balalardyń bilimderin jetildirý jáne psıhologııalyq qoldaý kórsetý.

«Budan ózge, mektepterde naýqas balalar anyqtalǵan jaǵdaıda olardy keıin qashyqtan oqytýǵa aýystyrý úshin algorıtm áreketteri ázirlendi. Bilim basqarmasyna ata-analar qaýymdastyǵymen sapaly keri baılanys ornatý, onyń ishinde ata-analarǵa keńes berý úshin barlyq bilim berý uıymdarynda «senim telefondary» men call- ortalyqtardyń jumystary jandandy «, - dedi Baqytjan Saǵyntaev.