Almatyda bıyl 1500-den astam esirtkini jarnamalaıtyn graffıtı joıyldy

ALMATY. QazAqparat – Almatyda jyl basynan beri esirtkini jarnamalaıtyn 1500-den astam graffıtı joıyldy. Ótken jyly eriktilerdiń kómegimen 300 myń graffıtı joıylǵan bolatyn. Bul týraly óńirlik kommýnıkatsııalar qyzmetiniń alańynda «Narkostop» jobasynyń PR mamany Janar Nurseıitova aıtty, dep habarlaıdy QazAqparat tilshisi.

Spıkerdiń sózinshe, eki jylda júıeli jumystar jasaldy.

«Qarapaıym mysal keltireıin, eger alǵashqy kúnderi 50-ge jýyq erikti esirtki jarnamalaryn boıaýǵa shyqsa, orta eseppen bir eriktige 100 jazýdan keletin. Qazirgi tańda 50 eriktige 10-15 jazýdan keledi. Bul - sýretterdi óshirip tastaǵan soń qaıta paıda bolǵan graffıtıler», - dedi Janar Nurseıitova.

Eske salsaq, «Narkostop» jobasy Almatyda 2021 jyly iske qosyldy. Graffıtıdegi sýretterdi óshirýden bastalǵan joba búginde baǵytyn keńeıtip, sıntetıkalyq táýeldilik máselesin sheshý joldaryn qarastyrýda. Sonymen qatar, almatylyqtar da aýlalarǵa kameralar ornatý arqyly esirtki qylmysymen kúreske úles qosýda.

Aıta keteıik, qala turǵyndary anonımdi túrde Almaty qalalyq polıtsııa departamentiniń WhatsApp-taǵy senim telefony 8 705 549 70 25 nemese «Narkostoptyń» jedel jelisi – 8 747 461 67 01 arqyly habarlasa alady.