Almatyda bıyl 100 kóppáterli úı kúrdeli jóndeýden ótedi

ALMATY. QazAqparat- Bıyl 100 kópqabatty turǵyn úı kúrdeli jóndeýden ótedi, onyń ishinde shatyry, qasbeti, kireberisi jáne ınjenerlik jelisi aýystyrylady, dep habarlaıdy QazAqparat tilshisi.

Almaty ákimdigi jańǵyrtýdyń bul kezeńi úılerdiń jaılylyq deńgeıin jańartýǵa jáne turǵyndar úshin jalpy ınfraqurylymdy jaqsartýǵa baǵyttalǵanyn atap ótti.

«70 kópqabatty úı jergilikti bıýdjet aıasynda jóndeledi. Atap aıtar bolsaq, Alataý aýdany – 3 úı, Almaly aýdany – 7, Áýezov – 30, Bostandyq – 15, Jetisý – 3, Medeý – 7, Túrksib aýdany boıynsha 5 úı qarastyrylǵan. Qalǵan 30 úıdiń jóndeý jumystary qaıtarylǵan qarajat esebinen júzege asyrylady. Qazirgi kezde «Almaty turǵyn úı» JShS osy atalǵan jobalardy tabysty iske asyrý úshin tehnıkalyq qujattamany daıyndaýmen jáne hattamalardy jınaýmen aınalysyp jatyr»,- dep habarlady qalalyq ákimdikten.

Aıta keteıik, «Almaty turǵyn úı» JShS 2011 jyldan bastap qalanyń turǵyn úı qoryn jóndeý jáne jańǵyrtý jónindegi memlekettik baǵdarlamalardy iske asyrý boıynsha operatory.

Ol óziniń qyzmetin «Turǵyn úı-kommýnaldyq ınfraqurylymdy damytýdyń 2026 jylǵa deıingi tujyrymdamasy» memlekettik baǵdarlamasyna sáıkes júzege asyryp, TKSh jańǵyrtýǵa erekshe nazar aýdarady.

2011-2022 jyldar aralyǵynda kompanııa Almatyda kóppáterli turǵyn úılerdi jóndeý boıynsha 965 jobany iske asyrdy.