Almatyda bıyl 10 jataqhana ashylady - Saıasat Nurbek

ALMATY. QazAqparat – Almatyda stýdenttik jataqhanalardaǵy oryn tapshylyǵy máselesi áli de ótkir tur. Bul týraly Ǵylym jáne joǵary bilim mınıstri Saıasat Nurbek telegram arnasynda jazdy, dep habarlaıdy QazAqparat tilshisi.

«Búginde munda 29 745 stýdent turatyn 96 jataqhana bar. Qazir qajettilik 32 myńnan astam tósek-oryn bolyp otyr. Ótken jyly halyqtyń áleýmettik osal toptaryndaǵy stýdentterge oryn berý máselesin sheshý úshin arnaıy shtabtyń jumysy uıymdastyryldy. Jataqhana tapshylyǵyn azaıtý máselesi boıynsha memleket bıznespen belsendi jumys júrgizedi. 2022 jyly memlekettik tapsyrys boıynsha qala kásipkerleri men Qarjy ortalyǵy arasynda qoldanystaǵy 4 nysandy 659 oryndyq jataqhanaǵa qaıta formattaý boıynsha kelisimsharttar jasaldy. Búgingi kúni barlyq nysan iske qosyldy», - dep jazdy Saıasat Nurbek.

Onyń sózinshe, bıyl 1 qyrkúıekke deıin 1 492 tósek-orynǵa arnalǵan 5 nysan, jyl sońyna deıin 450 tósek-orynǵa arnalǵan 2 nysan qaıta jańǵyrtylmaq.

«Budan basqa, jyl sońyna deıin jańa 3 stýdenttik jataqhananyń qurylysyn aıaqtaý josparlanyp otyr. Biz bıznes ókilderimen kelissózderdi jalǵastyramyz. Qazir qarjy ortalyǵynyń baǵdarlamasy arqyly óz esebinen jataqhana salýǵa daıyn 93 áleýetti ınvestordyń tizimi jasaldy. Júzege asyrylatyn baǵdarlama jáne oǵan qatysý sharttary týraly tolyq aqparat arnaıy saıtta (https://studdom.fincenter.kz) usynylǵan(, - dep habarlady Ǵylym jáne joǵary bilim mınıstri.

Ol sondaı-aq, búgin Almatyǵa jumys sapary aıasynda Qazaqstan-Brıtan tehnıkalyq ýnıversıtetiniń 980 oryndyq jataqhananyń qurylys alańynda bolǵanyn jazdy.

«Jospar boıynsha jataqhanany iske qosý merzimi – 2023 jyldyń jeltoqsan aıy. Salynyp jatqan jataqhanada stýdentterdiń turýyna, oqýyna jáne demalýyna barlyq qajetti jáne jaıly jaǵdaılar jasalady», - dep málim etti Saıasat Nurbek.