Almatyda bıshi ájeıdiń úıi órtenip, 8 adam baspanasyz qaldy
ALMATY. QazAqparat – Almatyda «Belsendi uzaq ǵumyr» ortalyǵynyń 73 jastaǵy bıshisi Ǵalııa Toqtarbaevanyń úıi órtenip ketti, dep habarlaıdy QazAqparat tilshisi.
Tilsiz jaý 8 adamdy baspanasyz qaldyrdy.
Úı ıesiniń aıtýynsha, órt 13 jeltoqsanda monshadan bastalǵan.
«Eshteńeden habarym bolmady. Nemeremmen tańǵy asymyzdy iship otyrǵanbyz. Bir ıis shyqqanyn baıqadym. Sol sátte kórshiler qorshaýdy qaǵa bastady. Syrtqy esikti ashsam, týra qarama qarsy turǵan monshadan qyzyl jalyn laýlap jatyr. Balalarym polıtsııa, órt sóndirýshilerdi shaqyrdy», - dedi ol.
Úı Túrksib aýdanynda Jansúgirov kóshesinde ornalasqan.
Úıde Ǵalııa Toqtarbaevanyń uly men kelini, 5 nemeresi turady. Qazir otbasy týystarynyń saıajaıyna kóship ketti.
«Qazir bizge janashyr adamdar kómektesip jatyr. Bireýler kıim ákep jatyr, bireýler tamaq tasýda. Ne ákelse de qabyldap jatyrmyz. Búgin balalarym HQKO qujat rásimdeýge ketti. Abyroı bolǵanda, úıdiń qujattary kólikte bolǵan. Eń bastysy — barlyǵymyz amanbyz», - dedi ol.
Ǵalııa Toqtarbaeva – kásibı bıshi. Zeınetke shyqqan soń estrada jáne tsırk kolledjinde sabaq bergen.
Sosyn «Belsendi uzaq ǵumyr» ortalyǵyna egde kisilerge bı úıretetin jattyqtyrýshy bolyp jumysqa turǵan.
«Asyl áje» bı ansamblin qurǵan.
«Belsendi uzaq ǵumyr» ortalyǵynyń Instagram paraqshasynda qarjylaı jáne zattaı kómek jınaý týraly aqparat jarııalandy.
