Almatyda Birjan sal ánderiniń keshi ótedi
ALMATY. 11 naýryz. QazAqparat /Erlik Erjanuly/ - 16 naýryzda Almatydaǵy Ómirbek Joldasbekov atyndaǵy Stýdentter saraıynda "Birjan dep atym shyqty alty alashqa" atty Birjan Qojaǵululy ánderiniń keshi bolady.
Ony ál-Farabı atyndaǵy Qazaq ulttyq ýnıversıteti men "Adyrna" ulttyq-etnografııalyq birlestigi birigip uıymdastyryp otyr. Óner keshine Ramazan Stamǵazıev, Erkin Shúkimanov, Sáýle Janpeıisova, Ardaq Isataeva, Erlan Rysqalı sekildi birqatar elge belgili ánshiler qatysady dep josparlanyp otyr.
Ánshi, sazger, aqyn Birjan Qojaǵululy 1834 jyly qazirgi Aqmola oblysy Eńbekshilder aýdanynda ómirge kelip, 1897 jyly sonda kóz jumǵan bolatyn. Ol qazaqtyń dástúrli ánshilik ónerin, halyq mýzykasyn jańa beleske kóterip, ony óziniń án-óleńderimen tolyqtyrǵan asa iri óner sańlaǵy. Birjan sal ánderiniń taqyryp aıasy óte keń. Bozbala kezinde-aq el arasynda ánshilik ónerimen kózge túsken ol óz zamanyndaǵy Shóje, Salǵara, Tolybaı, Orynbaı, Núrkeı, Segiz seri, Arystan tárizdi áıgili óner sheberleriniń tálimin alady. Jasy 20-ǵa jeter-jetpesten óz janynan án shyǵaryp, toı-dýmannyń kórkine aınalǵan Birjan Qojaǵulynyń 1865 jyl qazaqtyń bas aqyny Abaı Qunanbaıulymen kezdesýi shyǵarmashylyq qyzmetiniń damýyna tyń serpin beredi. Onyń "Aıtbaı", "Adasqaq, "Jambas sıpar", "Jonyp aldy", "Altyn baldaq", "Kókek", "Janbota", "Temirtas" sııaqty shyǵarmalary dástúrli qazaq ánderiniń klassıkalyq úlgileri retinde qazaq mádenıentiniń altyn qorynan óz ornyn aldy.
