Almatyda birneshe ret qarýly qaraqshylyq shabýyl jasap, iz jasyryp júrgender quryqtaldy
ALMATY. 2 aqpan. QazAqparat /Názıra Eleýhan/ - Almatyda birneshe ret qarýly qaraqshylyq shabýyl jasap iz jasyryp júrgen 32 jastaǵy Ravıl esimdi azamat quryqtaldy.
Ol buǵan deıin esirtki zattaryn zańsyz saqtaǵany jáne kisi tonaǵany úshin eki ret qylmystyq jaýapkershilikke tartylǵan.
Temir tordyń tártibinen eshqandaı nátıje shyǵarmaǵan Ravıl túrmeden shyǵa sala óziniń eski soqpaǵyna qaıta túsken. Ádetinshe, ashana pyshaǵymen qarýlanyp, tek qana názik jandylardy tonaýmen aınalysqan.
«Ol jaqynda óziniń kezekti qurbanyn tonap jatqan jerinde quryqtaldy. Qylmysker óz isin Almatynyń «Mamyr», «Aqsaı», «Jetisý» sııaqty halyq kóp turaqtanǵan aýdandarynda júzege asyryp keldi. Qazirgi tańda onyń on eki ret qarýly qaraqshylyq shabýyl jasaǵandyǵy anyqtalyp otyr. Tergeý amaldary áli de jalǵasýda jáne onyń budan ózge de qylmystyq isterge qatysy bar-joǵy tekserilýde»,-dedi Almaly aýdandyq ІІB-nyń bastyǵy, polıtsııa polkovnıgi Talǵat Seıilhanov.
