Almatyda birneshe massaj salony jezóksheler prıtony bolǵan
ALMATY. QazAqparat – Almatyda bodı massaj salony retinde tirkelip, biraq ıntımdik qyzmet kórsetken nysandardyń ıeleri men qyzmetshileri ustaldy, dep habarlaıdy QazAqparat tilshisi.
Intımdik qyzmet salonynyń biri qalanyń Áýezov aýdanyndaǵy «Almas» shaǵyn aýdanynda anyqtaldy. Salonda jumys isteıtinder massajdan bólek, jynystyq qatynas qyzmetin de kórsetken. Polıtseıler mekeme ákimshisi men salonda jumys isteıtin jeti qyzdy oqıǵa ornynda ustady.
«Sol túni ózderin saýyqtyrý massajy salondary retinde kórsetken taǵy eki nysan anyqtaldy. Іs júzinde, bular – turaqty klıentteri jáne jumys kestesi bar prıtondar. QR ÁQbK-niń 450-babynda kózdelgen quqyq buzýshylyq belgileri boıynsha jezókshelikpen aınalysý úshin úı-jaı bergen mekeme ıelerine qatysty ákimshilik is qozǵaldy. Sonymen qatar, 15 jeńil júristi áıelge de ákimshilik shara qoldanyldy. Olardyń kópshiliginiń Almatyda tirkeýi joq. Jetkizilgenderdiń jeke basy qandaı da bir qylmys pen quqyq buzýshylyqqa qatysy bar-joǵyna tekserildi», - dedi Áýezov aýdandyq polıtsııa basqarmasynyń bastyǵy Ulan Ábilqaıyr.
Ol sondaı-aq, mundaı reıdtik sharalardyń turaqty túrde júrgizilip jatqanyn atap ótti.
