Almatyda birneshe ataýly kúnderge arnalǵan «Kaspıı: munaı jáne mádenıet» fotokitaby jaryqqa shyqty
ALMATY. 12 qyrkúıek. QazAqparat /Názıra Eleýhan/ - Almatyda «QazAqparat» UK bastamasymen birneshe ataýly kúnderge - QR Táýelsizdiginiń 20 jyldyǵyna, Dossor munaıynyń 100 jyldyǵyna jáne Mańǵystaý munaıynyń 50 jyldyǵy men Qumkól munaı kenishiniń 25 jyldyǵyna arnalǵan «Kaspıı: munaı jáne mádenıet» fotokitaby jaryqqa shyqty.
Kitap osydan 7 jyl buryn, Qazaqstannyń Mańǵystaý, Atyraý oblystary jáne Reseıdiń Astrahan oblysymen ótken alǵashqy ǵylymı-pýblıtsıstıkalyq ekspedıtsııanyń izimen jazylǵan. Ekspedıtsııaǵa qatysýshylar qatarynda elimizdiń tanymal tulǵalary - mádenıettanýshy-ǵalym Murat Áýezov, jazýshy Sátimjan Sanbaev, aqyn Baqytjan Kanapıanov, rejısser Amangeldi Tajibaev, tarıhshy Marat Sembın jáne taǵy da basqa tulǵalar bolǵan.
Basylymda Dossardan bastap Qumkólge deıingi Qazaqstandaǵy munaı salasynyń barlyq damý kezeńderi kórsetilgen. Kitapqa kóptegen áserli fotosýrettermen qatar, ekspedıtsııa kezinde túsirilgen fotosýretter, jýrnalısttik kúndelikter, joljazbalar men ekspedıtsııaǵa qatysýshylardyń fılosofııalyq esseleri, Qazaqstannyń munaı salasyndaǵy ardagerleriniń estelikteri engen.
"Bul kitaptyń basty maqsaty - Batys Qazaqstan men oǵan irgeles aýmaqtardyń qyzyqty tarıhy men qundy mádenıetin, kórikti tabıǵatyn, asa qýatty ónerkásiptik -ındýstrıaldyq áleýetin jan-jaqty etip kórsetý, qoǵamda bolyp jatqan barlyq úrdisterdiń negizgi ólshemi - Adam ekenin ashý",-deıdi kitaptyń avtory belgili jýrnalıst Ǵadilbek Shalahmetov.
Kitap ǵylymı-tanymdyq sıpatqa ıe. Fotoalbom N.Marabaev atyndaǵy "Munaıshy" qoǵamdyq qorynyń jáne «QazMunaıGaz» ulttyq kompanııasynyń qoldaýymen daıyndalǵan. Basylym 1000 tırajben jaryqqa shyqty.
