Almatyda «Birligimiz jarasqan» aktsııasy aıasynda Astana kúnine arnalǵan merekelik sharalar ótýde
;ALMATY. Maýsymnyń 26-sy. QazAqparat /Názıra Eleýhan/ - Búgin Almatyda «Birligimiz jarasqan» aktsııasy aıasynda Astana kúnine arnalǵan merekelik sharalar ótýde. Mereke qala ákimi Ahmetjan Esimovtyń qatysýymen ótken velosherýmen ashyldy,
dep habarlaıdy QazAqparat.
Búgin qala alańdarynda keshke deıin "Arman kýbogyna" jáne Azıada - 2011 oıyndaryn qoldaý maqsatynda sporttyń ár túrinen buqaralyq jarystar, jeńimpazdar sherýi, "Alyptar saıysy" atty mýzykalyq ázil-shoýlar ótetin bolady. Sporttyq jarystar kásibı sportshylar men nıet bildirýshiler arasynda ótedi.
Jarystarǵa ótinish bildirgen barlyq Almaty jurtshylyǵy qatysýda. Olar velosıped, strıtbol, jaǵajaı voleıboly, júgirý syndy sport túrlerinen jarysqa túsip, kúsh synasýda.
Búgin sonymen qatar, atalmysh shara aıasynda "Esirtkisiz bolashaq úshin" atty jastar sherýi ótti. "Astana" alańynan bastaý alǵan sherý Ortalyq demalys parkinde aıaqtaldy. Aktsııaǵa sportshylar, mádenıet qaıratkerleri, jastar jáne stýdenttik uıymdar jáne qala jurtshylyǵy qatysty. Sherý sońynda esirtkige qarsy belsendilik kórsetken 15 kúresker jáne jasóspirimder arasynda ótken VI-shy spartakıada júldegerleri arnaıy syılyqtarmen marapattaldy.
Keshke «Medeý» sport kesheniniń stadıonynda «Arman kýbogyna» ótken jarystyń júldegerlerin marapattaýǵa arnalǵan Jeńimpazdar sherýi bolady.
Іs-shara «Tamasha» men «Nasha kazashanyń» arasyndaǵy - «Alyptar saıysymen» aıaqtalady. Shoýǵa Naǵıma Esqalıeva, Parvız Nazarov, Qaırat Túntekov, Mádına Sadýaqasova, Jámılá Serkebaeva, Aqjol Meıirbekov, Tolqyn Zabırova, Bahyt Shadaeva, «Úrker», «Daýys Interneshnl» toptary jáne taǵy da basqa estrada jáne balet juldyzdary qatysady. Keshtiń arnaıy qonaǵy reseıdiń tanymal ánshisi - Tımatı.
