Almatyda birqatar jolaýshy avtobýstarynyń baǵdary ózgertildi
ALMATY. QazAqparat- Almatyda 2015 jyldyń 15 maýsymynan bastap, Abaı dańǵyly boıynsha qoǵamdyq kólikter eki baǵytta arnaıy belgilengen jolaqtarmen júretin bolady.
Al birin-biri qaıtalaıtyn avtobýs baǵyttary qysqartylady. Bul týraly búgin Almaty qalasy ákiminiń baspasóz qyzmetinen habarlady.
«Jobanyń basty maqsaty - qalanyń baǵdarlyq jelisin ońtaılandyrý, jolaýshy tasymaldaý sapasyn arttyrý jáne qalanyń ekologııalyq jaǵdaıyn jaqsartý» - delingen habarlamada.
Sonymen qatar, bekitilgen jol júrý kestesine sáıkes, Abaı dańǵyly boıyndaǵy jolaýshy kólikteri úshin oqshaýlandyrylǵan jolaq, avtobýstar men trolleıbýstardyń eshqandaı bógetsiz júrip otyrýyn qamtamasyz etetin bolady. Al bul jolaýshylardyń A núktesinen B núktesine deıin barý ýaqytyn qysqartady. Odan basqa, qalada jol jıekterine avtokólikterdi qoıýǵa arnalǵan avtoturaqtar salý jumystary júrýde.
«Almaty qalasynyń Jolaýshylar kóligi basqarmasy osyndaı sharalar arqyly avtobýstardyń ózara jarysýyn toqtatyp, jolaýshylarǵa qyzmet kórsetý sapasyn arttyrýdy josparlap otyr» - delingen habarlamada.
Sonymen, jolaýshy tasymaldaý jumysyn ońtaılandyrý maqsatynda Abaı dańǵyly boıynsha №35, №105 avtobýs marshrýttary men №№16, 8 trolleıbýs marshrýttary alynyp tastalady, Al №25 avtobýs Áıgerim yqshamaýdanynan «Máskeý» metro beketine deıin, №120 avtobýs Aınabulaq yqshamaýdanynan «Alataý» metro beketine deıin, №123 avtobýs Kókjıek yqshamaýdanynan «Baıqońyr» metro beketine deıin jáne №128 avtobýs «Saıran» metro beketine deıin ǵana júretin bolady.
