Almatyda birqatar úı jaryqsyz qaldy
Almaty qalasynyń Bostandyq aýdanyndaǵy Esqaraev kóshesindegi jylý trassasyn qaıta jańartý kezinde transheıaǵa topyraq opyrylyp túsip, jaryq sónip qaldy, dep habarlaıdy QazAqparat tilshisi.
«Almaty jylý jelileri» JShS – niń málimetinshe, bul merdiger uıymnyń tehnologııalyq normalardy saqtamaýy saldarynan boldy.
«Qulaǵan jer qabaty jaqyn mańdaǵy úılerdi qýattandyratyn elektr kabelderin zaqymdady. Qazirgi ýaqytta «Alataý Jaryq kompanııasy» AQ apattyq brıgadasy qýatsyz ǵımarattarǵa elektr energııasyn berýdi qalpyna keltirýmen aınalysyp jatyr. Sondaı-aq, jergilikti kafeniń jazǵy alańyna ishinara zııan keltirildi. Bolǵan oqıǵanyń saldaryn joıý protsesi qalalyq ákimdiktiń baqylaýyna alyndy», - delingen habarlamada.
Ákimdik ókilderi, shtattan tys jaǵdaıdyń týyndaýyna jol bergen merdiger uıymǵa qatysty zańnamaǵa sáıkes sharalar qabyldanatynyn atap ótti.
