Almatyda birqatar mekemege jarylǵysh zat qoıyldy degen aqparat jalǵan - polıtsııa
ALMATY. QazAqparat - Almaty polıtsııasy qaladaǵy sottardyń ǵımaratyn tekserip shyqty. Ǵımarattarda jarylǵysh zat qoıylǵan degen aqparat jalǵan bolyp shyqty, dep habarlaıdy QazAqparat tilshisi.
Qalalyq Polıtsııa departamentiniń resmı ókili Saltanat Ázirbektiń aıtýynsha, belgisiz bireýler Almatydaǵy birqatar ǵımarattarda jarylǵysh zat bar ekenin habarlaǵan.
Qazir qalanyń jedel jáne shuǵyl qyzmet ókilderi Almatydaǵy birqatar mekemelerde, atap aıtqanda sot ǵımarattarynda tekserý júrgizdi. Arnaıy algorıtmge sáıkes, ǵımarattardan adamdar qaýipsiz jerge kóshirilip, kólikter qashyqtaý jerge aparyldy.
Tekserý qorytyndysyna sáıkes, jarylǵysh zat týraly aqparat jalǵan bolyp shyqty.
Almaty polıtsııasy azamattardy sabyrlyq saqtap, qaladaǵy qaýipsizdik sharalaryn atqarýǵa túsinikpen qaraýǵa shaqyrdy.
