Almatyda birqatar qoǵamdyq kólik júrgizýshileri jumysqa shyǵýdan bas tartty
ALMATY. QazAqparat - Almatyda birneshe avtobýs júrgizýshileri jumysqa shyǵýdan bas tartty. Naqtyraq aıtqanda, 34, 29 baǵdar boıynsha qatynaıtyn avtobýs júrgizýshileri jelige shyqpady, dep habarlaıdy QazAqparat tilshisi.
Feısbýk qoldanýshysy Toqtar Jaqashtyń jazýynsha, búgin jelige shyqpaǵan júrgizýshiler saralanǵan tarıf engizilgenimen, olardyń jalaqysy 23-35 myń teńge aralyǵynda qalǵan. Sondyqtan, olar búgin jumysqa shyǵýdan bas tartqan.
Al, atalǵan baǵdarlarǵa jaýapty «Green bus» transport kompanııasy jaǵdaıǵa qatysty óz ustanymyn bildirdi.
«Saralanǵan tarıfti engizgenge deıin túsim júrgizýshilerdiń qaltasynda qalyp otyrdy. 1 tamyzdan, saralanǵan tarıfti engizgennen bastap, avtoparkterdiń tabysy 40 paıyzǵa artty. Endi bul aqsha júrgizýshilerdiń qaltasyna emes, avtoparkke túsedi. Júrgizýshiler buǵan narazy, kúndelikti kiris josparyn tómendetýdi suraıdy. Tranzaktsııa boıynsha jospar oryndaıtyn júrgizýshiler jaqsy jalaqy alady. Máselen, bir qyzmetker 14 kún istep, 118 myń teńge aldy. Al, kelesi qyzmetker sonsha jumys istegenimen jospardy oryndaı almaı, aqsha urlap, 51 myń teńge ǵana aldy. Endi olar jalaqyny ósirýdi talap etip otyr. Men ne úshin onyń jalaqysyn kóterýim kerek. Kún saıyn 20 myń teńgeni qaltasyna basyp ketkeni úshin be? Biz olarmen jınalys ótkizdik, jumysqa shyqpaǵandardy sotqa berip, keltirgen shyǵyndy óndirip alatyn bolamyz. Qazir rezervtegi júrgizýshilerdi shaqyryp jatyrmyz», - dedi «Green bus» JShS Almaty qalasy boıynsha dırektory Baýyrjan Kýlıshev.
