Almatyda birqatar iri medıtsınalyq nysandar salý josparlanýda
ASTANA. QazAqparat - Almatyda birqatar iri medıtsınalyq nysandar salý josparlanýda. Bul týraly Almaty qalasynyń ákimi Baýyrjan Baıbek jańa «Kerýen-Medicus» medıtsına ortalyǵynda bolǵanda aıtty, dep habarlaıdy QazAqparat.
Ákimniń aıtýynsha, medıtsınalyq nysandar arasynda jańa onkologııalyq ortalyq, qazaq- japon dıagnostıkalyq ortalyǵy, prezenthana jáne halyqaralyq «Mount Sinai» gospıtali bar.
Qala basshysy klınıka ujymymen kezdesý barysynda Orta Azııa qalalary arasynda Almatynyń «Salamatty qalalar» búkilálemdik uıymy júıesine alǵashqylardyń biri bolyp engenin jáne medıtsınalyq týrızmdi damytýda úlken áleýetke ıe ekenin atap ótti. Tek 2017 jyldyń ózinde ǵana 2 myńnan astam sheteldik azamattar men elimizdiń ózge óńirlerinen kelgen 270 myń adamǵa medıtsınalyq qyzmet kórsetilgen. Al bul óz kezeginde qala bıýdjetine 240 mln teńgeden astam kiris ákelgen.
Ol óziniń sózinde medıtsınalyq qyzmet sapasyn arttyryp qana qoımaı, densaýlyq saqtaý salasyna jańa tehnologııalardy engizip, odan ári damytýdyń barynsha mańyzdy ekenin de aıtty. Syrqattyń aldyn alýǵa jete nazar aýdarylýy tıis. Demek, dıagnostıkany erte qoıý men salaýatty ómir saltyn damytý qajet.
«Shyn mánisinde densaýlyq saqtaý qalanyń ekojúıesinen bastaý alady, sondyqtan biz ekologııa máseleleri men «Qala adamdar úshin» kontseptsııasyna erekshe nazar aýdaramyz, jaıaý júrginshi aımaqtaryn, saıabaqtar men skverlerdi jasaýǵa, ekologııalyq qoǵamdyq kólikti engizýge, Almaty aýlalaryn jańartýǵa, balalar jáne spor alańdaryn salýǵa jete mán beremiz. Qazirgi kezde JEO-1 modernızatsııalanýda jáne JEO -2 gazǵa kóshirý úshin tehnıkalyq - ekonomıkalyq negizdemesi jasalýda. Jyl aıaǵyna deıin jeke sektor tolyq gazdandyrylýy tıis», - dedi Baýyrjan Baıbek.
Aıta keterligi, sońǵy 2 jyl ishinde medıtsına mekemelerin jaraqtandyrý deńgeıi 75%-ǵa jetti, osynyń arqasynda qyzmet kórsetý sapasy artyp, naqtyly dıagnoz qoıylyp, syrqat túri erte anyqtalatyn boldy. Qalalyq densaýlyq saqtaý júıesin tsıfrlandyrý barysynda ár patsıenttiń elektrondy densaýlyq tólqujatyn engizý, kem degende 35 jyljymaly modýldi keshen arqasynda ortalyqtandyrýdy iske asyrý jáne Smart tehnologııany paıdalanyp medıtsnalyq kómek sapasyn arttyrý josparlanǵan.
Zamanaýı tehnologııalardy tıimdi qoldaný arqasynda jańa «Kerýen-Medicus» klınıkasynda 3D-formatynda kúrdeli operatsııalar jasaýǵa múmkindik týdy. Budan ózge, koreılik «Severance Hospital» jáne nemistiń «Freiburg University Klinik» klınıkalarymen yntymaqtastyq jáne kadrlar daıarlaý jóninde ózara kelisimge qol qoıylǵan.
«Men Qazaqstandaǵy medıtsınanyń damýy - Eýropa men Amerıkadan kem túspeıtin erekshe model ekenin aıtqym keledi. Búgin klınıkany aralap shyqtym, arnaıy elektrondy karta jasaý úshin tirkelýden bastap barlyq sharalardyń óte tıimdi ári búginge zamanǵa laıyq ekenin kórdim. Dıagnostıka men terapııa úshin úlken múmkindikter bar. Sonyqtan bul klınıkanyń Qazaqstannyń basqa aýrýhanalary úshin úlgi bolatyndyǵyna men senimdimin», - dep atap ótti professor, Fraıbýrg qalasyndaǵy ýnıversıtet klınıkasynyń dekany Hıýbert Blıým.
