Almatyda birqatar avtobýstyń marshrýty ýaqytsha ózgerdi
ALMATY. QazAqparat – Almatyda birqatar avtobýstyń marshrýty ózgerdi, dep habarlaıdy QazAqparat tilshisi.
Raıymbek dańǵyly men Pýshkın kóshesi qıylysyndaǵy baǵdarshamnyń isten shyǵýyna baılanysty qoǵamdyq kólik marshrýtyna ózgeris engizildi.
Raıymbek dańǵyly men Pýshkın kóshesi qıylysyndaǵy baǵdarshamnyń kabel kárizin apattyq qalpyna keltirý jumysy júrgizilip jatyr.
Osyǵan baılanysty qańtar aıynyń 9 men 11 aralyǵynda Raıymbek dańǵylymen shyǵys baǵyttaǵy qoǵamdyq kólik qozǵalysy ýaqytsha jabyq bolady.
«4, 7, 11, 23, 50, 54, 59, 69, 78, 117, 141 marshrýttary ýaqytsha Raıymbek dańǵyly boıyndaǵy tonnel arqyly uıymdastyrylyp, jolaýshylardy otyrǵyzý men túsirý úshin aıaldama ýaqytsha Jangeldın kóshesi qıylysynda ornalasady» dep habarlady Almaty qalalyq mobıldilik basqarmasy.
Sonymen qatar №203, 207, 204, 221, 208, 220, 222, 224, 228 qala mańy marshrýttary ýaqytsha Jangeldın – Maqataev kóshesi – Kókbazar jáne keri qaraı da osy baǵyt boıynsha uıymdastyrylady.
