Almatyda bireýler psıholog áıeldi soqqyǵa jyqty
ALMATY. QazAqparat – Almatyda psıholog Svetlana Bojko buzaqylardyń qolynan ólip qala jazdady, dep habarlaıdy QazAqparat tilshisi.
Belgisiz bireýler ony kastetpen uryp ketken. Bul týraly psıhologtyń qyzy Anastasııa Býkına QazAqparat tilshisine aıtyp berdi.
Onyń aıtýynsha, oqıǵa 20 shildede bolǵan. Keshkisin eki adam kelip, Svetlanadan jón suramaq bolǵan.
«Sol sátte er adam kelip, kastetpen mańdaı tusynan urǵan. Burynǵy túrinen eshteńe qalmady. Jaq súıegi synǵan. Muryn súıegi synǵan. Gaımor qýysy qalpyna kelmeıdi. Mıy shaıqalǵan. Bet-aýzy isip ketken. Qantalap tur. Muryn súıekteri shashylyp ketken. Kóz júıkesi qysylyp qalǵan. Synǵan súıekterdiń ornyna tıtan qoıyldy. 4 saǵat boıy eki ret ota jasaldy. Bir de bir hırýrg ota jasaýǵa bel sheship kirise qoımady. Anama ota jasaýǵa 1 mln teńgedeı jumsaldy», - deıdi jábirlenýshiniń qyzy Anastasııa Býkına.
Onyń aıtýynsha, bul qylmys tapsyryspen jasalýy múmkin. Svetlananyń shyrqyraǵan daýsyn estigen kórshisi ony arashalap qalǵan.
Japa shekken áıeldiń qurbysy polıtsııanyń áreketsizdigine nalyp otyr.
«Rafık (kúdikti) qazir bostandyqta júr. Oǵan qaraqshylyq degen aıyp taǵylǵan joq. Oǵan tek buzaqylyq jasady degen aıyp taǵyldy», - deıdi qurbysy Irına Kalnıtskaıa.
Aıta ketý kerek, bul qalada tirkelip jatqan birinshi jaǵdaı emes.
Munyń aldynda Jacpot tobynyń ánshisi Ksenııa Ashyǵalıeva kúıeýi Baýyrjan Ashyǵalıevtiń uryp-soqqanyn aıtyp shaǵymdanǵan edi. Qylmystyq isti tekserý protsesin polıtsııa departamentiniń basshysy óz baqylaýyna aldy. Ksenııa Ashyǵalıeva - «Jackpot» tobynyń ánshisi bolsa, onyń kúıeýi Baýyrjan Ashyǵalıev - osy topta gıtarashy.
