Almatyda bireýdiń kóligin tapsyryspen órtegen kúdikti ustaldy
ALMATY. QazAqparat -Almaty polıtsııasy bireýdiń kóligin tapsyryspen órtep jibergen adamdy anyqtady, dep habarlaıdy QazAqparat tilshisi.
Órtenip ketken «Subaru» avtokóligi 68 jastaǵy K. esimdi almatylyqqa tıesili.
«Qylmys 14 jeltoqsanǵa qaraǵan túni Shagabýtdınov kóshesinde ornalasqan úılerdiń biriniń aýlasynda bolǵan. Kólik órtengende eshkim zardap shekpegen. Bul fakt Qylmystyq kodekstiń 202-baby 2-bóligi boıynsha sotqa deıingi tergeýdiń biryńǵaı tizilimine tirkeldi. Sot-órt-tehnıkalyq saraptamasy taǵaıyndaldy. Sonymen qatar, bul qylmysty ashý úshin arnaıy tergeý-jedel toby quryldy, onyń quramyna qalalyq krımınaldyq polıtsııa da kirdi», - dedi Almaty qalalyq Polıtsııa departamenti bastyǵynyń orynbasary Rústem Ábdirahmanov.
Onyń aıtýynsha, jedel jáne arnaıy is-sharalar kesheniniń nátıjesinde kúdikti anyqtalyp, qamaýǵa alyndy. Bul – 1983 jyly týǵan Sh. esimdi azamat bolyp shyqty.
«Kúdikti jumysy úshin 100 myń teńge ýáde etken óziniń tanysy, 1959 jyly týǵan M. azamattyń tapsyrysyn oryndaǵanyn moıyndady. Tapsyrys berýshi de dereý ustaldy. Avtokólik ıesi ekeýiniń arasynda óz ara kelispeýshilik bolǵan», - dedi Rústem Ábdirahmanov.
Sonymen qatar, ol eki kúdikti de ýaqytsha ustaý ızolıatoryna qamalǵanyn jetkizdi.
