Almatyda bireýdiń atynan onlaın nesıe alatyn alaıaqtardyń qatary kóbeıdi
ALMATY. QazAqparat - Almatyda onlaın nesıeden aldanǵandardyń qatary kóbeıdi. Bul týraly qalalyq polıtsııa departamenti bastyǵynyń orynbasary Rústem Ábdirahmanov málim etti, dep habarlaıdy QazAqparat tilshisi.
Almaty qalalyq polıtsııa departamenti shaǵyn nesıe uıymdary men kollektorlyq kompanııalardyń basshylarymen jınalys ótkizdi.
Jıyn barysynda shaǵyn qarjy uıymdarynyń qaýipsizdik júıesin nyǵaıtý máseleleri talqylandy.
«Dóńgelek ústelde talqylanǵan negizgi taqyryptyń biri - birneshe jyl boıyna ózektiligin joǵaltpaǵan, kerisinshe, ınternette belgili bir basymdyqqa ıe bolyp otyrǵan onlaın nesıege baılanysty jaǵdaı. Búginde bizdiń elde azamattarǵa onlaın aqshalaı nesıe beretin 20-ǵa jýyq kompanııa jumys isteıdi. Bul óte yńǵaıly, biraq ekinshi jaǵynan, tájirıbe kórsetkendeı óte qaýipti. Ókinishke qaraı, alaıaqtar qashyqtan qoljetimdi shaǵyn qarjy uıymdary arqyly basqa adamdardyń jeke derekterin paıdalanyp, aqshalaı nesıe alady. Onlaın nesıeden aldanǵandardyń qatary kóbeıdi», - dedi Almaty qalalyq polıtsııa departamenti bastyǵynyń orynbasary Rústem Ábdrahmanov.
Onyń aıtýynsha, bul faktiler onlaın nesıeleýdegi álsiz aqparattyq qaýipsizdikti kórsetedi.
«Jıyn barysynda biz, aldanǵan ondaǵan azamat kómekke júginetin tergeý organy retinde, osy ShQU-nyń qaýipsizdik júıesine túzetýler engizýdi usyndyq, sonyń arqasynda osy qylmystardyń jasalýyn barynsha azaıtýǵa jáne halyqty qorǵaýǵa bolady»,-deıdi ol.
Birinshiden, onlaın nesıe alýǵa suranys túsetin uıaly telefon nómiriniń tirkelýin ony rásimdegen adamnyń jeke derekterimen birge mindetti túrde tekserý kerek.
Ekinshiden, nesıe rásimdelip jatqan azamattyń bank kartasyna aýdarylǵan qarajattyń maqsaty týraly mindetti sms-habarlama jiberilýi tıis.
Úshinshiden, adamdy jeke bıometrııalyq parametrleri boıynsha taný qajet.
