Almatyda bir jylda 14 myń onkologııalyq naýqas statsıonarlyq em qabyldady
ALMATY. QazAqparat - Almatyda bir jylda 14 myńnan astam onkologııalyq naýqas statsıonarlyq em qabyldady, dep habarlaıdy QazAqparat tilshisi.
Almaty qalasynda onkologııalyq naýqastardyń sany 2019 jylmen salystyrǵanda 1733-ke artty.
Ótken jyly bul kórsetkish 14546 naýqasty qurasa, 2019 jyly 12813 patsıent emdeldi.
2020 jyly qaterli isiktiń eń kóp taralǵan túri – sút bezi, ishek pen asqazan qaterli isikteri.
«Almaty onkologııa ortalyǵynyń hırýrgtary aptasyna 45-55 ota jasaıdy. Máselen, ótken jyly 2514 ota boldy. Olardyń ishinde keýde qýysy, ish, onkoýrologııa, bas jáne moıyn isikterine arnalǵan otalar bar. Olardyń 40% ınvazıvti, ıaǵnı laparoskopııalyq jolmen jasalatyn otalar», - deıdi onkohırýrgııa bóliminiń meńgerýshisi Nurlan Baltaev.
Búginde almatylyq mamandar isikti joıý otalaryn jasap qana qoımaı, anatomııalyq aqaýlardy plastıkalyq jolmen joıýdy júzege asyryp júr.
Máselen, byltyr tildiń túbiriniń qaterli isigi dıagnozy qoıylǵan naýqasqa ota ústelinde anatomııalyq aqaýlardy plastıkalyq jolmen joıa otyryp, kúrdeli ota jasaldy.
«Otalaý bınokýlıarlyq optıka astynda 7 saǵatqa sozyldy. Kólemi 20 sm bolǵan isikti dárigerler terimen birge alyp tastady. Ota sátti ótip, naýqas qazirgi ýaqytta t sóılep, tamaq ishe alady»,- deıdi dáriger.
