Almatyda bir jarym aıda 30 myńnan astam turǵyn JRVI juqtyrdy

ALMATY. QazAqparat - Almatyda 6 qyrkúıekten búginge deıin JRVI jáne tumaýmen syrqattaný kórsetkishi artqany baıqalady. Bul týraly óńirlik kommýnıkatsııalar qyzmetinde ótken brıfıngide Almaty qalalyq qoǵamdyq densaýlyq saqtaý basqarmasynyń bas epıdemıology Baqjanar Muhamadıeva aıtty, dep habarlaıdy QazAqparat tilshisi.

Spıkerdiń aıtýynsha, Almatyda JRVI-diń 30 415 jáne tumaýdyń 3 jaǵdaıy tirkelgen.

«Eger epıdemııaǵa deıin aýrýdyń 65,2% balalar popýlıatsııasyna baılanysty bolsa (3876 jaǵdaı), búgingi kúni eresekter arasynda artyp otyr»,- dedi ol.

Dáriger tumaýdyń aldyn alýda eń tıimdi ádis – ýaqtyly vaktsınatsııa ekenin aıtty.

«Jyl saıyn tumaýǵa qarsy vaktsınany epıdemııaǵa deıin (qazan-qarasha) alý qajet. Sebebi, tumaý vırýsy mýtatsııaǵa jáne ózgerýge qabiletti. Vaktsınatsııadan keıin ımmýnıtet 14 kúnnen keıin qalyptasady jáne maýsym boıy saqtalady (1 jylǵa deıin). Bas memlekettik sanıtarııalyq dárigerdiń qaýlysy negizinde jergilikti bıýdjet esebinen, ıaǵnı tegin túrde tek táýekel tobyndaǵy adamdar ǵana tumaýǵa qarsy ekpe alady. Táýekel tobyndaǵy adamdar arasynda tumaýǵa qarsy vaktsınatsııa bıyl 6 qyrkúıekte bastaldy»,- dedi Baqjanar Muhamadıeva.

Onyń aıtýynsha, táýekel tobyna medıtsına qyzmetkerleri; medıtsınalyq uıymdarda dıspanserlik esepte turǵan balalar; balalar úıinde tárbıelenetin balalar, qarttar úıindegi kontıngenti; sondaı-aq, epıdemıologııalyq kórsetkish boıynsha 60 jastan asqan qart adamdar, júktiliktiń 2 jáne 3 trımestrindegi júkti áıelder, sozylmaly aýrýlary bar adamdar, mektep-ınternattarynda tárbıelenetin balalar osy topqa jatady.