Almatyda bir top jigit TQS sheberin soqqyǵa jyqty
Áleýmettik jelide bir top jigittiń Almatydaǵy tehnıkalyq qyzmet kórsetý stantsııalarynyń birine kirip, stantsııa sheberin soqqyǵa jyqqan sátiniń vıdeosy tarady.
Atalǵan oqıǵa boıynsha qalalyq polıtsııa departamenti málimdede jasady.
«Bul fakti QR Qylmystyq kodeksiniń 293-baby boıynsha sotqa deıingi tergeýdiń biryńǵaı tiziliminde tirkelgenin jáne Jetisý aýdandyq polıtsııa basqarmasy tergeıtinin habarlaıdy. Atalǵan qylmysty ashý maqsatynda jedel-tergeý toby quryldy», - delinedi qalalyq polıtsııa departamentiniń habarlamasynda.
Jetisý aýdandyq polıtsııa basqarmasynyń bastyǵy polıtsııa polkovnıgi Darhan Musanov kúdiktilerdiń jeke basy anyqtalǵanyn aıtty. «Olardy ustaý-ýaqyt máselesi. Kinálilerdi ustaýǵa jáne olardy jaýapkershilikke tartýǵa baǵyttalǵan jedel jáne arnaıy is - sharalar kesheni júrgizilýde», - dedi ol.
Aıta keteıik, atalǵan qylmystyq isti tergeý barysyn Jetisý aýdandyq prokýratýrasy da baqylaýǵa aldy.