Almatyda bir top tanymal óner adamdary, jazýshy, sportshylar daýys berdi
Almatynyń №622 saılaý ýchaskesinde daýys bergen Qazaqstannyń halyq ártisi, kıno jáne teatr akteri, kınorejısser Doshan Joljaqsynov qazaqstandyqtardy belsendi bolýǵa shaqyrdy.
«Qadirli aǵaıyn, búgingi kún – memleketimiz úshin, elimiz úshin eń bir mańyzdy kúnderdiń biri. Biz ata-babamyzdyń amanatyn arqalaǵan elmiz. Keleshek urpaqtyń arman-múddesine jaýapty elmiz. Sondyqtan kelip, óz úmitkerlerińizdi tańdańyzdar, daýys berińizder. Mende óz daýsymdy berdim», – dedi ol.
Almatyda «Dos-Muqasan» ansambliniń solısi Murat Qusaıynovtyń pikirinshe, elge saıası ózgerister qajet. Saılaýdan keıingi ózgerister qoǵamdyq-saıası ómirdiń barlyq salasyna áser etedi.
«Atap aıtqanda, ekonomıkalyq ósip artyp, jańa áleýmettik baǵdarlamalar paıda bolady»,- dedi kompozıtor.
Ánshi Muqasan Shahzadaev te daýys berdi.
«Biz turǵylyqty mekenjaı boıynsha №157 saılaý ýchaskesinde óz tańdaýymyzdy jasadyq. Jańadan saılanǵan Memleket basshysy halyqtyń áleýmettik-ekonomıkalyq ál-aýqatyn arttyrýǵa úles qosady dep úmittenemiz», - dedi QR eńbek sińirgen qaıratkeri Muqasan Shahzadaev.
Sondaı-aq, Jámıla Serkebaeva da № 254 saılaý ýchaskesinde daýys berdi.
«Búgin Ulttyq kitaphanadaǵy ózimniń ýchaskeme bardym. Daýysymdy bere otyryp, elimizde árqashan beıbitshilik bolady dep úmittenemin. Biz órkenıetti elderdiń qataryna kirýge tyrysamyz. Elimiz kópultty, bul Otanymyzdyń jáne meniń ınternatsıonaldy otbasymnyń ereksheligi. Memleket damıdy, ortaq mádenıet artady ári jaqsy jaqqa qaraı ózgerister bolady dep úlken úmit artamyn», - dedi QR eńbek sińirgen qaıratkeri Jámıla Serkebaeva.
Al Maqpal Júnisova Prezıdent saılaýyna qyzymen birge keldi.
Odan bólek, Almatydaǵy №301 saılaý ýchaskesinde jazýshy, Memlekettik syılyqtyń laýreaty Nurlan Orazalın da daýys berdi.
«Elimniń irgesi shaıqalmasyn, myqty bolsyn, biraýyzdy bolaıyq, urpaǵymyz aqyldy bolsyn, bolashaǵymyz bekem bolsyn degen ózimniń júrek qalaýymmen kelgen daýsymdy berdim. Urpaǵyma bolashaqty qamtamasyz etetin Qazaqstanǵa daýys berý úshin keldim», - dedi aqyn, Memleket jáne qoǵam qaıratkeri Nurlan Orazalın.
Sonymen qatar, Qazaqstannyń eńbek sińirgen ártisi Baqtııar Taılaqbaevta Almatyda óziniń azamattyq boryshyn oryndady.
«Saılaýda biz respýblıkanyń áleýmettik, ıdeologııalyq jáne eń bastysy ekonomıkalyq damýyn qamtamasyz etetin eldiń laıyqty kóshbasshysyn anyqtaıtynymyzǵa senimdimin. Bul bizdiń memleketimiz úshin óte mańyzdy. Men elimizdiń bolashaǵy úshin óz daýysymdy berdim,- dedi Baqtııar Taılaqbaev.
Almatyda sportshylar da saıası belsendilik tanytyp jatyr.
Bylǵary qolǵap sheberi Nazym Qyzaıbaı «Aqjar» shaǵyn aýdanyndaǵy №186 orta mektepte oryn tepken №515 saılaý ýchaskesine baryp, Qazaqstan Prezıdentin saılaýǵa úles qosty.
