Almatyda bir táýlikte 585 adam koronavırýs juqtyrdy
ALMATY. QazAqparat - Almaty qalasy qoǵamdyq densaýlyq basqarmasynyń ókili, telemedıtsına ortalyǵynyń basshysy Laýra Myrzaǵalı onlaın brıfıng barysynda qaladaǵy epıdemıologııalyq ahýal týraly aıtty, dep habarlaıdy QazAqparat tilshisi.
«Búgin tańerteńgi aqparat boıynsha 585 adamnyń koronavırýs juqtyrǵany anyqtaldy. Munyń ishinde 490-y sımptomdy, jeńil jáne ortasha deńgeıdegi belgilermen, 95-i sımptomsyz aýyrǵan. Biraq bul kórsetkish deńgeıi táýliktiń sońyna deıin ózgerýi múmkin»,- deıdi ol.
Laýra Myrzaǵalıdiń aıtýynsha, Almatyda koronavırýs juqtyrý jaǵdaıy ósip otyr.
«Osy sátte statsıonarda 3 146 naýqas jatyr, bul san keshke deıin ózgerýi múmkin. Bir táýlikte 309 naýqas kelip tústi. Búginde bos tósek-oryndar sany 1 080 quraıdy. Naýqastardy syrqatynyń deńgeıine qaraı eshelon boıynsha bólip jatqyzamyz. Syrqaty jeńil túrde ótip jatqandar úı karantıninde, ıaǵnı 5 251 adam dárigerlerdiń baqylaýynda. Telemedıtsına ortalyǵy barlyq naýqaspen baılanysqa shyǵyp, jaǵdaılaryn bilip otyrady», - dedi Laýra Myrzaǵalı.
Aıta keteıik, 9 sáýir kúni Almatyǵa koronavırýsqa qarsy vaktsınanyń 57 myń dozasy jetkiziledi.
