Almatyda bir táýlikte 3 myńǵa jýyq adam vaktsına aldy
ALMATY. QazAqparat - Almaty qalasynda bir táýlikte 2 919 adam koronavırýsqa qarsy vaktsına saldyrdy, dep habarlaıdy QazAqparat tilshisi.
Qoǵamdyq densaýlyq saqtaý basqarmasy taratqan málimetke sáıkes, 8 maýsym kúni 2 919 almatylyq vaktsınalandy. Bıylǵy jyldyń 1 aqpany men 8 maýsymy aralyǵynda qalada barlyǵy 321 500 adamǵa ekpe salyndy. Vaktsına alǵandardyń jalpy sanynan 60 jastan asqan qart kisiler - 30 887.
Qalada 211 egý pýnkti jumys istep tur. 1 257 adamnan turatyn 304 egý brıgadasy bar. Sonymen qatar, 40 kóshpeli mobıldi brıgada uıymdastyryldy.
«Qazir medıtsınalyq uıymdarda, mektepterde, mádenıet, sport obektilerinde, bazarlar men qalanyń saýda, oıyn-saýyq ortalyqtarynda vaktsınatsııa pýnktteri jumys isteıdi» - dep naqtylady Qoǵamdyq densaýlyq saqtaý basqarmasy.
Aıta keteıik, 1 maýsym kúni Qytaı elinen «CoronaVac» vaktsınasynyń 500 myń dozasy Almatyǵa jetkizildi. Búginde turǵyndar 4 vaktsınanyń birin tańdaı alady.
