Almatyda bir táýlikte 160-tan astam jol apaty tirkeldi
ALMATY. QazAqparat- Ótken táýlikte Almatyda 163 jol-kólik oqıǵasy tirkeldi. Onyń saldarynan 48 adam zardap shegip, bir adam qaza tapty, dep habarlaıdy QazAqparat tilshisi.
Osyǵan oraı, Almaty polıtsııasy jol qozǵalysyna qatysýshylarǵa úndeý jasady.
«Aýa raıynyń nasharlaýyna baılanysty jol qozǵalysyna qatysýshylardy qaýipsizdik sharalaryn kúsheıtýge shaqyramyz. Kóbinese bul úndeý kólikti basqaratyn qala júrgizýshilerine arnalǵan. Biz olardy jol qozǵalysy erejelerin qatań saqtaýǵa, júrgizýshi mádenıetin tanytyp, zeıindiligin arttyrýǵa úndeımiz. Ádette, aýa raıynyń nasharlaýy jalpy jol qozǵalysy jaǵdaıyna áser etedi. Biz avtoáýesqoılardy kólikterin qys mezgiline aldyn ala daıyndaý kerektigin, qysqy dóńgelekterge aýystyrý qajettigin eskertemiz. Bul úndeý qazir óte ózekti jáne joldardaǵy qaıǵyly oqıǵalardyń aldyn alýǵa septigin tıgizedi», – dedi Almaty qalalyq PD Ákimshilik polıtsııa basqarmasy bastyǵynyń orynbasary Bolatbek Baıatanov.
Eske salaıyq, 8 qarasha kúni Almatyda Tóle bı - Abylaı han kósheleriniń qıylysynda eki avtobýs soqtyǵysty.
Alǵashynda polıtseıler 1 adamnyń kóz jumyp, 15 adamnyń zardap shekkeni týraly málimdegen bolatyn.
Keıin jaraqat alǵandar sany 17-ge artty.
Sońǵy málimet boıynsha, medıtsınalyq kómekke 21 adam júgingen, onyń 9-y aýrýhanaǵa jatqyzyldy.
Sondaı-aq sol kúni Almatyda avtobýs pen jeńil kólik soqtyǵysty.
