Almatyda bir táýlikte 136 jol apaty boldy
ALMATY. QazAqparat - Almatyda bir táýlikte 136 jol apaty boldy, dep habarlaıdy Polisia.kz.
Aýa raıynyń nasharlaýyna baılanysty Almatynyń tártip saqshylary jol qozǵalysyna qatysýshylardy qaýipsizdik sharalaryn kúsheıtýge shaqyrady.
«Bul úndeý qaýipti qozǵalys quralyn basqaratyn qala júrgizýshilerine arnalǵan. Biz olardy jol qozǵalysy erejelerin qatań saqtaýǵa, júrgizýshi mádenıetin tanytyp, zeıindiligin arttyrýǵa shaqyramyz. Bul úndeý qazir óte ózekti jáne qala joldarynda qaıǵyly oqıǵalardy boldyrmaýǵa septigin tıgizedi», – dedi Almaty qalalyq PD Jergilikti polıtsııa qyzmeti basqarmasynyń bastyǵy Erjan Uzabaev.
16 qarasha tańǵy saǵat 08:00-den 17 qarasha tańǵy saǵat 08:00-ge deıin Almaty qalasynda 136 JKO tirkeldi, onyń 26-synda zardap shekkender bar. Adam shyǵyny joq.
«Sonymen qatar aýa raıynyń nasharlaýyna jáne qar jaýǵanyna, aýa temperatýrasynyń mınýs deńgeıge deıin tómendeýine baılanysty, jol qaýipsizdigin qamtamasyz etý maqsatynda júrgizýshiler men kólik ıelerine kólikteriniń dóńgelekterin qysqy mezgilge arnalǵan dóńgelekterge aýystyrýlaryn suraımyz», – dedi Uzabaev.
