Almatyda bir myńǵa jýyq júrgizýshige aıyppul salyndy
ALMATY. QazAqparat - Almaty qalasynda byltyr 997 júrgizýshige múgedekke arnalǵan oryndarǵa kóligin qoıǵany úshin aıyppul salyndy, dep habarlaıdy QazAqparat tilshisi.
Patrýldik polıtsııa polkiniń qyzmetkerleri kólikti turaqqa, atap aıtqanda, múmkindigi shekteýli adamdarǵa arnalǵan jerge qoıýdy (erejesin buzý) anyqtaý boıynsha reıd ótkizdi.
«Mundaı beıqam júrgizýshiler óte kóp bolyp shyqty. Árkimniń ár túrli syltaýy bar, keıbireýi bul belgini kórmegen, al basqalary bes mınýtqa qoıǵan. Jaýapkershilikten jaltarý úshin adamdar túrli qýlyqqa barýǵa daıyn. Sonymen qatar, kólikte «múgedek» degen belginiń bolýy múmkindigi shekteýli adamnyń kólik júrgizip otyrǵanyna kepildik bola almaıtynyn eskerý qajet. Taǵy da eskerte ketetin jaıt, múmkindigi shekteýli jandar ǵana kóligin arnaıy belgilengen jerlerge qoıýǵa quqyly», – dedi Almaty qalalyq PD Jergilikti polıtsııa qyzmeti basqarmasynyń bastyǵy Manap Sattarov.
Sonymen qatar, ol kólik quralyn múgedekterge arnalǵan oryndarǵa qoıǵany úshin QR ÁQBtK-niń 597-babynyń 4-bóligi boıynsha 10 AEK kóleminde aıyppul qarastyrylǵanyn, al bir jyl ishinde osy erejeni qaıtalap buzǵany úshin 15 AEK kóleminde aıyppul qarastyrylǵanyn eske saldy.
2020 jyly kólik quralyn qoıý erejesin buzǵany úshin 16 321 júrgizýshi ákimshilik jaýapkershilikke tartyldy, onyń 997-si kóligin múgedekterge arnalǵan oryndarǵa qoıǵany aıyppul tóledi. 2021 jyldyń 15 kúninde 581 júrgizýshi kólik qoıý erejesin buzǵany úshin ákimshilik jaýapkershilikke tartyldy, olardyń 30-y múgedekterge arnalǵan oryndarǵa kóligin qoıǵan.
