Almatyda bir mektep shtattyq rejımde jumys istep jatyr
ALMATY. QazAqparat – Almatyda bir meketep shtattyq rejımde jumys istep jatyr. Bul týraly Almaty qalalyq Bilim basqarmasynyń jalpy orta bilim berý bóliminiń basshysy Aqmaral Aıtýarova aıtty, dep habarlaıdy QazAqparat tilshisi.
Onyń aıtýynsha, jańa oqý jylynda qaladaǵy 207 memlekettik jáne 63 jekemenshik mektepte 290 myńnan asa bala, sonyń ishinde 30 myńǵa jýyq 1-synyp oqýshysy oqýdy bastady.
«Epıdemıologııalyq jaǵdaıǵa baılanysty balalar men muǵalimderdiń densaýlyǵy men qaýipsizdigin saqtaý maqsatynda 206 memlekettik mektepte oqytý protsesi qashyqtan oqytý formatynda bastaldy. «Sulýsaı» yqshamaýdanynda shalǵaı ornalasqan №197 jalpy orta mektebindegi 60 oqýshy shtattyq rejımde oqyp jatyr. Qazirgi tańda qalalyq bas sanıtardyń qaýlysyna sáıkes qala mektepterinde ata-analardyń qalaýy boıynsha 1-2 synyp oqýshylary úshin «kezekshi synyptar» uıymdastyryldy. Mektepter dezınfektsııalyq quraldarmen tolyq qamtamasyz etilgen», - dedi Aqmaral Aıtýarova.
Sonymen qatar, ol tamyz aıynda 15 myńnan asa muǵalim Kundelik.kz, Bilimland.kz, Microsoft.Teams bilim berý platformalaryn oqý protsesinde qoldaný boıynsha kýrstan ótkenin aıtty.
«Almaty qalasynyń bilim berý mekemelerinde qashyqtan oqytý tehnologııalaryn qoldana otyryp oqý protsesin ádistemelik jáne tsıfrlyq qoldaý boıynsha is-sharalar jospary ázirlendi. Qalanyń 56 úzdik muǵalimimen bastaýysh synyptar úshin telesabaqtar túsirilip jatyr. Bul sabaqtar Balapan, Elarna telearnalarynda kórsetilýde», - dedi ol.
