Almatyda bir kúnde 4 myń PTR test jasaý kózdelip otyr
ALMATY. QazAqparat - Barlyq almatylyqtardy PTR ádisi arqyly tekserý múmkin emes. Bul týraly Almaty qalalyq Qoǵamdyq densaýlyq saqtaý basqarmasynyń bastyǵy Tileýhan Ábildaev málim etti, dep habarlaıdy QazAqparat tilshisi.
«Búgingi tańda qalada bir táýlikte 3 myń PTR test jasalady. Ony 4 myńǵa jetkizýdi kózdep otyrmyz. Biraq eki mıllıon halyqty PTR ádisi arqyly tekserý múmkin emes. Ony júzege asyra almaımyz», - dedi Tileýhan Ábildaev Almatydaǵy Qoǵamdyq keńestiń onlaın otyrysynda.
Sonymen qatar, ol qalada ońtústikkoreıalyq jyljymaly mobıldi skrınıngtik ortalyqtyń ashylǵandyǵyn atap ótti. Onda almatylyqtar aqysyn tólep PTR test tapsyra alady. Sondaı-aq mundaı qyzmetti «Olımp» medıtsınalyq ortalyǵy da kórsetedi.
Óz kezeginde Almaty qalasynyń memlekettik bas sanıtarlyq dárigeri Jandarbek Bekshın megopolıste 88 myń test jasalǵanyn aıtty.
«Biz bárine 100% PTR dıagnostıkasyn usyna almaımyz. Búgingi tańda 88 myń test júrgizdik. Bizde test jetkiliksiz. Halyqty júz paıyz testileýge múmkindik joq. Álemniń birde-bir ekonomıkasy muny kóter almaıdy. Alaıda adamdardy tekserý jaǵynan biz qazir álemniń jetekshi tobyna kiremiz, óıtkeni ákimdik buǵan múmkindik berdi «, - dedi ol.
