Almatyda bir kúnde 20 kásipker karantın talabyn buzǵan
ALMATY. QazAqparat - Bir kún ishinde Almatyda karantın talaptaryn 20 kásipker buzǵan, dep habarlaıdy QazAqparat tilshisi.
Epıdemııalyq jaǵdaıdyń kúrdelenýine baılanysty ákimdik sanıtarlyq normalarǵa beı-jaı qaramaýǵa shaqyrady.
20 qazan kúni Almaty qalasynyń monıtorıngilik toptary 56 tekserý ótkizdi. Olardyń barysynda 21 nysanda karantın talaptary buzylǵany anyqtaldy. Tıisti jumystar júrgizildi. Betperde rejımin buzý boıynsha jeke tulǵalarǵa ákimshilik quqyq buzýshylyq týraly 2 hattama toltyryldy.
Almaty qalasynyń Bas memlekettik sanıtar dárigeriniń qaýlysymen qyzmetine tyıym salynǵan nysandar, sondaı-aq jumys rejıminiń buzylýy anyqtaldy.
Áýezov aýdanynyń monıtorıngilik toptary birneshe nysanda maska rejımi saqtalmaǵanyn tirkedi.
Sonyń ishinde Eýrazııalyq bank ǵımaraty, Abaı kóshesiniń boıyndaǵy lagmanhana, «Almasat» medıtsınalyq ortalyǵy bar.
Bostandyq aýdanynda «Jungle» restobary, «Marmarıs» dámhanasy, «Marmarıs wok» dámhanasynda karantın sharalary buzylǵan.
Monıtorıngilik top Naýryzbaı aýdanyndaǵy «Kóktem» dúkeninen, «Býrrıto» dámhanasy, «Mandarın» dúkeni, sondaı-aq sulýlyq salony men keńse úı-jaıynda karantındik is-sharalardyń buzylǵanyn anyqtady.
Ákimdik kásipkerlerdi epıdemııalyq jaǵdaı kúrdelene túsken kezde sanıtarlyq normalardy qatań saqtaýǵa jáne kelýshiler men qyzmetkerlerdiń densaýlyǵyna qaýip tóndirmeýge shaqyrady.
Almaty ákimdigi qala turǵyndary men qonaqtaryn barlyq saqtyq sharalaryn: maska kııýdi, áleýmettik qashyqtyqty saqtaýdy, dezınfektsııalyq quraldardy paıdalanýdy jáne múmkindiginshe adamdar kóp jınalatyn oryndarǵa barmaýdy eskertedi.
