Almatyda bir qoǵamdyq kólikten ekinshisine aýysyp otyrý tegin bolady
ALMATY. QazAqparat - Almatyda kólik qurylymyn damytý jónindegi sheberlik-jospardy bekitý 2023 jyldyń jeltoqsanyna josparlanǵan. Sonyń aıasynda megshapolıste bir qoǵamdyq kólikten ekinshisine aýysyp otyrý tegin bolady. Bul týraly Erbolat Dosaev ótken juma kúni Qazaqstan Prezıdenti Qasym-Jomart Toqaevqa esep berý barysynda aıtty, dep habarlaıdy QazAqparat tilshisi.
«Birinshi kezeńde 2024 jyly Raıymbek dańǵylyndaǵy BRT pılottyq dáliziniń qurylysy bastalady jáne ekinshi kólikke tegin aýysyp otyrýǵa múmkindik beretin jańa tarıftik baǵa engiziledi», – dep atap ótti Almaty ákimi.
Ekinshi kezeń barysynda, 2025-2026 jyldary LRT kólik dálizderiniń sany 10-ǵa deıin ulǵaıady jáne uzyndyǵy 26 km bolatyn birinshi LRT jelisin iske qosady. Ol jeli batys jaqtan qala ortalyǵyna barady. Almaty-1 jáne Almaty-2 stantsııalary jer ústi metropolıtenin qosady.
«Kólik jelisin damytý trafıkti tıimdi basqarýǵa arnalǵan quraldardyń bolýyn boljaıdy. 2025 jyly qalalyq magıstraldar, qoǵamdyq kólik jáne «aqyldy» baǵdarshamdar biriktiriletin zııatkerlik júıeni iske qosý josparlanýda»,-dedi Shahar basshysy.
Eske salaıyq, Memleket basshysy 18 tamyz kúni Almatyǵa is saparmen kelgen bolatyn.
Buǵan deıin Almatynyń 2040 jylǵa deıingi Bas josparyn ázirleýshiler qoǵamdyq kólikti damytý perspektıvalary týraly aıtqan bolatyn.
