Almatyda bir aıǵa jýyq ýaqyt buryn joǵalǵan jigit aman tabyldy
ALMATY. QazAqparat - Almatyda bir aıǵa jýyq ýaqyt buryn polıtsııa izdeý salǵan jigit tabyldy, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, bıyl 13 tamyzda Bostandyq aýdanynyń polıtsııa basqarmasyna jergilikti turǵyn shaǵym túsirgen. Ol bıylǵy jyldyń 7 tamyzy kúni 2004 jyly týǵan N. esimdi ulynyń úıinen shyǵyp qaıta oralmaǵanyn aıtqan.
Áıeldiń sózinshe ulynyń densaýlyǵymen baılanysty máseleler bolǵan. Jyl basynan beri uly úıinen úsh ret, ótken jyly úıden tórt ret ketip qalǵan.
«N. esimdi azamattyń habarsyz joǵalý deregi boıynsha Bostandyq aýdanynyń polıtsııa basqarmasynda izdeý isi tirkeldi. Arnaıy izdeý toby quryldy. Jas jigit tabyldy. Qazir ol týǵan-týystarymen birge», - dep habarlady qalalyq polıtsııa departamentiniń baspasóz qyzmeti.
