Almatyda bir aptada karantın talaptary 147 ret buzylǵan
ALMATY. QazAqparat - Almatyda monıtorıngtik toptar 2-7 tamyz aralyǵynda 840 nysandy tekserdi, olardyń 147-sinde karantın talaptary buzylǵany anyqtaldy, dep habarlaıdy QazAqparat tilshisi.
Qala ákimdiginiń málimetinshe, birneshe ret eskertýge qaramastan, kásipkerler belgilengen jumys ýaqytyn buzýdy, úılený toılary men ózge de merekelerdi uıymdastyrýdy jalǵastyrýda. Sonymen qatar, ınspektorlar qoǵamdyq kólikte tekserý júrgizip, betperde rejımin buzýshylardy anyqtaýda.
Aýdandyq ákimdikterdiń, jergilikti polıtsııa qyzmetiniń qyzmetkerlerinen, «Atameken» kásipkerler palatasynyń ókilderinen turatyn monıtorıngtik toptardyń tekserý nátıjeleri boıynsha 63 hattama jasaldy, onyń ishinde zańdy tulǵalarǵa 2348 185 teńge somasynda 7 aıyppul salyndy. Jeke tulǵalarǵa qatysty maska rejımin buzǵany úshin 39 hattama toltyrylyp, 494 035 teńge kóleminde aıyppul salyndy.
Almatydaǵy saýda mekemelerinde, qoǵamdyq kólikterde jáne qoǵamdyq tamaqtaný oryndarynda COVID-19 boıynsha epıdemııaǵa qarsy talaptardyń saqtalýyna kún saıyn monıtorıng júrgiziledi. Mysaly, 5-8 tamyz aralyǵynda zańdy tulǵalar 83 zańbuzýshylyqty anyqtady. Ótken aptada baqylaý toptary qoǵamdyq kólikterde maska rejıminiń saqtalýyn tekserdi. 110 -nan astam avtobýs tekserildi, 23 adamǵa qatysty QR ÁQBtK 1-bóliminiń 425-baby boıynsha ákimshilik hattamalar jasaldy.
Kelesi avtobýs baǵyttarynda buzýshylyqtar anyqtaldy: 1, 98, 32, 123, 79, 11, 9, 45, 22, 135, 105, 201, 7, 126, 60, 114, 25, 5, 5V, 29, 65 , 37, 205, 224, 20, 148, 38, 62, 210, 45, 18. Barlyq materıaldar tıisti sharalar qoldaný úshin aýdandyq sanıtarlyq-epıdemıologııalyq baqylaý bólimderine jiberildi.
Eske salsaq, qazirgi ýaqytta Almaty «qońyr qyzyl aımaqta». Osyǵan baılanysty aýrýdyń taralýyn boldyrmaý úshin birqatar shekteý sharalary iske asýda.
Ońtústik astanada ótken aptada birneshe toı anyqtaldy.
Sonymen, 5 tamyzda Naýryzbaı aýdanynda saǵat 16.09 shamasynda Qalqaman shaǵyn aýdanyndaǵy «Mara» meıramhanasynda 40 adamnyń qatysýymen merekelik shara ótti.
7 tamyzda Medeý aýdanynda saǵat 00.31 shamasynda «Billionaire» karaoke-bary jumys istedi, onda shamamen 40 adam boldy.
Dál sol kúni Almaly aýdanynda «Premier Hall» meıramhanasynda zańbuzýshylyq tirkeldi, onda 100 qonaqtyń qatysýymen toı ótti.
Almaly aýdanynda 7 tamyzda shamamen 21.24 saǵatta «Krysha Mıra» barynda buzýshylyq tirkeldi, onda bir mezgilde 300-ge jýyq adam boldy.
7 tamyzda Bostandyq aýdanynda saǵat 14.10 shamasynda «Bi Kumis Restauran» meıramhanasynyń saltanat zalynda 150 adamnyń qatysýymen toı ótip, zańbuzýshylyq tirkeldi.
Medeý aýdanynyń monıtorıngtik toby 08.08.21 j. «Roıal týlıp» qonaqúı kesheniniń aýmaǵynda «Black star burger» ókilderi shara ótkizgen. Quqyq buzýshylyq faktisi boıynsha «Roıal týlıp» jáne «Black star burger» qonaqúı kesheniniń ókilderinen túsindirme alyndy.
Eske salsaq, Almatyda epıdemıologııalyq ahýal ýshyǵyp tur, kúnine 1500-den astam jaǵdaı tirkeledi, sáıkesinshe aýrýhanaǵa jatqyzý sany artyp keledi. Búginde juqpaly aýrýlar aýrýhanalarynda 5 591 adam bar, olardyń 187-si balalar. Reanımatsııada 397 patsıent bar, 63 adam ÓJJ appratyna, 159 ınvazıvti emes ÓJJ apparatyna, High flow apparatyna 152 adam qosylǵan. AMSAK pen Telemedıtsına ortalyǵynyń mobıldi toptary 11624 patsıentti úılerinde baqylaýda.
Elaman Turysbekov
