Almatyda bıohımııanyń negizin salýshy, akademık T. Darqanbaevtyń 100 jyldyǵyna arnalǵan konferentsııa ótýde
ALMATY. Qazannyń 28-i. QazAqparat /Názıra Eleýhan/- Búgin Almatyda ál-Farabı atyndaǵy Qazaq Ulttyq ýnıversıtetinde akademık, bıologııa ǵylymdarynyń doktory, professor, bıohımııanyń negizin salýshy, ǵalym-bıohımık, elimizdiń eńbek sińirgen ǵylym qaıratkeri Temirbaı Darqanbaevtyń 100 jyldyǵyna arnalǵan "Bıotehnologııa, nanotehnologııa jáne fızıko-hımııalyq bıologııa" atty halyqaralyq ǵylymı-tájirıbelik konferentsııa óz jumysyn bastady.
Onyń jumysyna Reseı, Mysyr, Germanııa, Amerıka, Frantsııa jáne TMD elderiniń jetekshi ǵalymdary men ekolog-mamandary, elimiz boıynsha Astana, Almaty, Qaraǵandy, Shymkent qalalaryndaǵy joǵary oqý oryndary men akademııalyq ınstıtýttardyń ǵalymdary qatysýda.
Konferentsııanyń maqsaty - Qazaqstanda jáne shet elde bıotehnologııa, nanotehnologııa jáne fızıko-hımııalyq bıologııanyń jaǵdaıyn jáne damý bolashaǵy anyqtaý bolyp tabylady.
Eki kúnge sozylatyn konferentsııa barysynda bıotehnologııa, nanotehnologııa jáne fızıko-hımııalyq bıologııa salalaryndaǵy qazirgi kezdegi máselelerine qatysty ózekti problemalar men ony sheshý jáne damytý joldary qaralmaq.
Konferentsııa ál-Farabı atyndaǵy QazUÝ-niń tarıhı murajaıynda ótken saltanatty mıtıngpen ashylyp, Temirbaı Darqanbaevtyń eskertkish sýretine gúl shoǵyn qoıý rásimimen bastaldy.
"Temirbaı Darqanbaev jaıynda kóp nárse aıtýǵa bolady. Men ol kisimen birge jumys istedim, januıamyzben de aralastyq. Eline kóp eńbek sińirgen adammen birge qyzmettes bolǵanymdy mártebe tutamyn. Ol iri ǵalym jáne keremet ustaz ǵana emes, Qazaqstandaǵy bıologııalyq ǵylymnyń sheber uıymdastyrýshysy boldy. Bunymen qatar qoǵamdyq jumystarmen de aınalysyp, onyń eńbegi memleket tarapynan baǵalandy. Onyń boıynda tamasha qasıetterdiń bári boldy, ol joǵary tárbıeliligimen erekshelendi. Temirbaı Darqanbaevty HH-shy ǵasyrdyń ekinshi jartysyndaǵy qazaq halqynyń dańqty uldary shoǵyryna jatqyzýǵa bolady", -dep atap ótti jıyn barysynda M. Aıthojın atyndaǵy bıohımııa jáne molekýlalyq bıologııa ınstıtýtynyń akademıgi, professor Murat Ǵylmanov.
Temirbaı Darqanbaevtyń shákirti, ál-Farabı atyndaǵy QazUÝ-niń bıologııa fakýlteti dekanynyń oqý jumysy jónindegi orynbasary Ádil Erejepovtyń aıtýynsha, Temirbaı Darqanbaev bıohımık, fızıolog, mıkrobıolog kadrlerin daıyndaýda úlken úles qosqan. "Ol 30 jyl bıohımııa jáne enzımologııa pánderi boıynsha lektsııa oqyp, alǵashqy ret qazaq tilinde bıohımııa kýrstaryn ashty. Soǵystan keıin QazUÝ basqarǵan ýaqyttary onyń nyǵaıýy men qanat jaıýyna úlken úles qosty. Bul kezeńde oqý orynyndaǵy stýdentter sany úsh esege ósip, 9 fakýltette 25 mamandyq boıynsha daıyndyqtar júrgizildi. Birneshe zerthanalar ashylyp, elimizdegi molekýlalyq bıologııa boıynsha ǵylymı ortalyqtardyń qurylýyna yqpal etti. Sondaı-aq, oqý-materıaldyq bazalar da keńeıdi. Búginde bizdiń bıologııa fakýltetinde onyń atymen atalǵan arnaıy aýdıtorııa bar",-dedi ol.
Temirbaı Darqanbaev - Lenın, Eńbek Qyzyl Tý, eki ret "Qurmet belgisi" ordenderimen, kóptegen medaldarmen jáne QazKSR Joǵarǵy Keńestiń Qurmet gramotalarymen marapattalǵan.
