Almatyda bilim salasyndaǵy jemqorlyq táýekelderi talqylandy

ALMATY. QazAqparat - Almatyda «Sanaly urpaq - jarqyn bolashaq» jemqorlyqqa qarsy jobasy aıasynda bilim berý salasyndaǵy jemqorlyq táýekelderiniń kartasy talqylandy. Joǵarǵy oqý oryndary, mektep, kolledj ókilderi «SANALY URPAQ» jobalyq keńsesine jınalyp, memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń, bilim basqarmasynyń jetekshilerimen bilim berý mekemelerindegi sybaılas jemqorlyq táýekelderin joıýdyń amal múmkindikterin qarastyrdy, dep habarlaıdy QazAqparat atalmysh jobalyq keńseniń baspasóz qyzmetine silteme jasap.

Sybaılas jemqorlyq táýekelderi kartasynyń jobasy ál-Farabı atyndaǵy QazUÝ janyndaǵy jemqorlyqqa qarsy tehnologııalar ǴZI tarapynan jasalǵan. Bul qujat mektepke deıingi oqý mekemelerinen bastap joǵary oqý oryndaryndaǵy basqarý, qarjy-sharýashylyq, bilim-ǵylym, áleýmettik-tárbıelik sııaqty bilim berý salalarynyń barlyq qyzmetin qamtyǵan. Jemqorlyq táýekelderi baǵalanatyn bolsa, onda sheteldik tájirıbege súıene otyryp jemqorlyqqa tosqaýyl qoıylatyn tıisti tehnologııalar men bilim berý mekemeleriniń resýrstaryn tıimdi paıdalaný boıynsha nusqaýlar jasaýǵa múmkindik týady.

«SANALY URPAQ» jobalyq keńsesiniń jetekshisi Qaıyrjan Toqyshev atap ótkendeı, «jemqorlyqqa qarsy tehnologııalar men jemqorlyq táýekelderi kartasynyń kezeńdik jáne júıelik jumysy bolashaqta bilim berý mekemeleriniń jemqorlyqqa qarsy jasaǵan qyzmetine qatysty barlyq deńgeıdegi reıtıngilik baǵa kórsetkishteri men naqty monıtorıng krıterılerin jasaýǵa septigin tıgizedi». Jemqorlyqqa qary jobalyq keńsesi óziniń reıtıngtik-monıtorıng qyzmetin sandyq formatyna shyǵarýdy josparlaýda. Onyń negizgi ajyramas bóligi áleýmettik saýalnanamalar bolyp tabylady jáne osy joly ótken otyrysta onyń ádis-tásilderi kópshilikke usynylyp tanystyryldy.

«Joǵaryda atalǵan quraldardy engizý ár bilim mekemesindegi sybaılas jemqorlyqqa qarsy qyzmetti shynaıy baǵalaýǵa múmkindik beredi. Olardyń barlyǵy jemqorlyqqa qarsy saıasattyń tıimdilik dárejesi boıynsha saralanatyn bolady. Reıtıng nátıjesi boıynsha Almaty qalasynyń kartasynda bilim salasyndaǵy eń az jáne eń kóp jemqorlyq táýekelder aımaǵyn anyqtaý uıǵarylýda», - dep aıtylǵan habarlamada.

Atalmysh joba uıymdastyrýshylarynyń oıynsha, sybaılas jemqorlyqqa qarsy reıtıng barlyq bilim mekemeleri úshin ózderiniń jemqorlyqqa qarsy saıasatyn júzege asyrýǵa degen pármendi yntalandyrý bolmaq. Jıyn barysynda ál-Farabı atyndaǵy QazUÝ-daǵy sybaılas jemqorlyqqa qarsy tehnologııanyń tájirıbesi talqylandy, munda 2011 jyldan beri «Jemqorlyqtan tys ýnıversıtet» jobas júzege asýda. Jıyn barysynda ýnıversıtettiń nátıjege qol jetkizýge baǵyttalǵan basqarýdy iske asyrýdaǵy ındıkatıvtik josparlaýy, oqytýshylar qyzmetiniń reıtıngtik turǵydan baǵalanyp eńbektiń dıfferentsıaldy tólenýi, biryńǵaı aqparattyq-saraptamalyq júıe men ýnıversıtettegi bıznes protsesterdiń sandyq tehnologııalaryn jasaý sııaqty jumystar jınalǵan qaýymnyń qyzyǵýshylyǵyn týdyrdy.