Almatyda bilim salasyndaǵy 33 myńnan astam qyzmetker 100% vaktsına aldy

ALMATY. QazAqparat - Almatyda memlekettik bilim berý uıymdarynda jumys isteıtin 33 myńnan astam qyzmetker 100% vaktsına aldy. Bul týraly «Almaty mektepteri postkovıdtik kezeńde: Bilim sapasy, balalardyń densaýlyǵy jáne otbasynyń róli» atty onlaın forým barysynda qala ákimi Baqytjan Saǵyntaev aıtty, dep habarlaıdy QazAqparat tilshisi.

«Oqytýdyń dástúrli formatyna oralýdyń mańyzdy sharttarynyń biri bilim berý salasy qyzmetkerlerin vaktsınalaý. Búginde medıtsınalyq qarsy kórsetkishteri barlardy qospaǵanda, memlekettik bilim berý uıymdarynda jumys isteıtin 33 myńnan astam qyzmetker 100% vaktsına aldy», – dedi Baqytjan Saǵyntaev.

1 qyrkúıekke deıin jeke bilim berý uıymdarynyń qyzmetkerlerin vaktsınalaý aıaqtalady, qazirdiń ózinde 10 myńnan astam adam nemese 95%-y ekpe saldyrdy.

«Jańa oqý jyly qarsańynda mektepterde jáne oǵan jaqyn aýmaqtarda qaýipsizdikti qamtamasyz etý boıynsha profılaktıkalyq sharalar kúsheıtildi. Búginde barlyq bilim berý uıymdary ishki jáne syrtqy beınebaqylaý júıelerimen qamtamasyz etilgen, 239 uıymda (33 balabaqsha, 187 mektep, 15 ınternat, 4 kolledj), bul júıeler Polıtsııa departamentiniń Jedel basqarý ortalyǵyna qosylǵan»,- dedi qala ákimi.

Almaty qalasynyń ákimi Baqytjan Saǵyntaev Bilim basqarmasyna Sanıtarlyq-epıdemıologııalyq baqylaý departamentimen jáne Qoǵamdyq densaýlyq basqarmasymen birge mektepterde 1 qyrkúıekten bastap sanıtarlyq-epıdemıologııalyq qaýipsizdikti qamtamasyz etý úshin turaqty monıtorıng júrgizýdi tapsyrdy.

Sonymen qatar, kúndelikti profılaktıkalyq is-sharalardyń júrgizilýine jáne mektepterdiń qajetti dezınfektsııalyq jáne basqa qorǵanys quraldarymen jabdyqtalýyna baqylaý ornatylady.