Almatyda «Bilim men ǵylymdaǵy aqparattyq tehnologııa jáne matematıkalyq modeldeý» dep atalatyn V halyqaralyq konferentsııa ótip jatyr
ALMATY. Qazannyń 1-i. QazAqparat /Erlik Erjanuly/ - Búgin Almatyda «Bilim men ǵylymdaǵy aqparattyq tehnologııa jáne matematıkalyq modeldeý» dep atalatyn V Halyqaralyq ǵylymı- ádistemelik konferentsııa óz jumysyn bastady.
«Abaı atyndaǵy Qazaq ulttyq pedagogıkalyq ýnıversıtetiniń fızıka-matematıka fakýltetiniń ınformatıka jáne qoldanbaly matematıka kafedrasynyń dástúrli bul sharasy 2-3 jylda bir ótkizilip turady. Máselen bul joly mektepterge ınformatıkanyń engizilýine 25 jyl tolýyna arnalyp otyr. Oǵan Qazaqstan, Qyrǵyzstan jáne Reseı elderiniń joǵary oqý oryndarynyń oqytýshy ǵalymdary men zertteýshileri qatysýda. Sondaı-aq bıyl alǵash ret konferentsııada elimizdiń túkpir-túkpirinen kelgen ınformatıka pánderiniń oqytýshylary da baıandama jasap jatyr», deıdi uıymdastyrý komıtetiniń ǵylymı hatshysy, fızıka-matematıka ǵylymdarynyń kandıdaty Farıda Ǵusmanova.
Onyń aıtýynsha, konferentsııa jumysy plenarlyq májilisterden keıin 2 kún boıy sessııalyq otyrystarda jalǵasady. Olar - «Qoldanbaly matematıka jáne matematıkalyq modeldeý», «Mehanıkalyq júıeler qozǵalysy men fızıkalyq úrdisterdi matematıkalyq modeldeý», «Informatıkany oqytý ádistemesi jáne bilim berýdi aqparattandyrý», «Mektepterde, kolledjder men joǵary oqý oryndarynda jaratylystaný ǵylymdary pánin oqytý sapasyn qamtamasyz etýdegi ınnovatsııalyq tehnologııa» degen taqyryptarda ótedi. Barlyq usynys-tilekter jınaqtalyp, talqylanǵan soń quzyrly organdar nazaryna usynylǵaly otyr.
