Almatyda bilim grantyn «alyp beretin» boıjetken ustaldy
ALMATY. QazAqparat– Almatyda boıjetken ózin medıtsınalyq ýnıversıtettiń stýdenti retinde tanystyryp, alaıaqtyq qylmys jasaǵan, dep habarlaıdy QazAqparat tilshisi.
Almatyda ózin medıtsınalyq ýnıversıtettiń stýdenti retinde tanystyrǵan 23 jastaǵy boıjetken bilim berý salasynda alaıaqtyqpen aınalysqan.
«Bilim berý salasynda alaıaqtyq jasaǵany úshin Túrkistan oblysynyń 1996 jylǵy týmasy ustaldy. Ol «medýnıversıtettiń stýdentimin, grant alyp bere alamyn, ol jerde jaqsy tanystarym bar», dep mektep bitirýshiler men basqa da oqý oryndarynyń stýdentterin aldaǵan. Kúdikti qurbandarymen tikeleı baılanysqa shyqpaǵan, únemi dostaryn paıdalanyp, baılanys ornatqan. Osy qyzmeti úshin ol ár adamnan 250-300 myń teńgege deıin aqsha alǵan. Qazirgi ýaqytta onyń qalada 10-nan astam osyndaı alaıaqtyq iske qatysy bary anyqtaldy», - dedi Áýezov aýdandyq polıtsııa basqarmasynyń bastyǵy Álisher Tursynbetov.
Qazir kúdiktige qatysty QR QK-niń 190-baby boıynsha sotqa deıingi tergeý bastaldy.
