Almatyda bilim, densaýlyq salasynda 400-den astam joba iske asyrylady
ALMATY. QazAqparat – Almatyda Nur Otan partııasynyń saılaýaldy baǵdarlamasynyń jol kartasy aıasyndaǵy áleýmettik jobalardy iske asyrý barysy qaraldy, dep habarlaıdy QazAqparat tilshisi.
Almaty qalasy ákiminiń orynbasary Erjan Babaqumarov pen Nur Otan partııasy Almaty qalalyq fılıalynyń birinshi orynbasary Meıirjan Otynshıev Nur Otan partııasy saılaýaldy baǵdarlamasynyń Jol kartasyn Almatyda júzege asyrý máseleleri boıynsha onlaın-keńes ótkizdi. Jıynǵa qala ákiminiń orynbasary І. Óserov pen qalalyq basqarmalardyń basshylary qatysty.
Keńeste partııanyń saılaý aldyndaǵy ýádeleri aıasynda iske asyrylýy josparlanǵan áleýmettik jáne ınfraqurylymdyq jobalar talqylandy. Atap aıtqanda, bilim berý jáne densaýlyq saqtaý salasyndaǵy jobalar. Qalanyń jaıly qalalyq orta, bilim, qoǵamdyq densaýlyq basqarmalary basshylarynyń, sonymen qatar birqatar aýdan ákimderiniń aqparattary tyńdaldy.
Jalpy, 2025 jylǵa deıingi megapolıstegi Jol kartasy aıasynda bilim berý jáne densaýlyq saqtaý salasynda 400-den astam jobany júzege asyrý josparlanǵan. Onyń ishinde – jańa nysandardyń qurylysy, bar ǵımarattardy jóndeý jáne seısmıkalyq kúsheıtý.
Búginde 240 balaǵa arnalǵan eki memlekettik balabaqshanyń qurylysy aıaqtaldy, 30 jekemenshik mektepke deıingi mekeme ashyldy, mektep pen medıtsınalyq mekeme kúrdeli jóndeýden ótti. 100-den astam bilim berý jáne densaýlyq saqtaý nysandarynda jobalaý jáne qurylys jumystary bastaldy.
Sonymen qatar, pandemııamen júrgizilip jatqan kúresti eskere otyryp, birqatar jobalardy iske asyrý merzimderi qaıta qaraldy. Atap aıtqanda, Ortalyq klınıkalyq aýrýhananyń jansaqtaý pavılondary men qabyldaý bólmesin jóndeý epıdemıologııalyq ahýal jaqsarǵanǵa deıin keıinge qaldyryldy.
Ákimniń orynbasary Erjan Babaqumarov halyqtyń suranystaryn eskere otyryp, josparlanǵan áleýmettik jobalardy iske asyrýdyń mańyzdy ekenin aıtty. Medıtsınalyq mekemeler joq shaǵyn aýdandarda otbasylyq-dárigerlik ambýlatorııalar salynady. Bul qala turǵyndaryn qadamdyq qashyqtyqta medıtsınalyq qyzmettermen qamtýǵa múmkindik beredi.
Keńestiń qorytyndysy boıynsha jaýapty basqarmalarǵa partııanyń qalalyq fılıalymen birge Jol kartasy tarmaqtarynyń oryndalýyn baqylaýdy kúsheıtý tapsyryldy.
Eske salsaq, partııanyń Almaty qalasy boıynsha Jol kartasy osy jyldyń aqpan aıynda usynylyp, bekitilgen bolatyn. Jalpy, Jol kartasy qalalyqtardyń ómir súrý sapasyn jaqsartýǵa baǵyttalǵan 32 maqsatty ındıkatorlardy qarastyrǵan
