Almatyda bilim berý salasyndaǵy memlekettik tildiń ahýalyn talqylaýǵa arnalǵan halyqaralyq konferentsııa bolady
ALMATY. 28 naýryz. QazAqparat - Almatyda 29 naýryzda «QR Bilim berý salasyndaǵy memlekettik til: qazirgi ahýaly jáne mádenıetaralyq yqpaldastyq máseleleri» taqyrybynda halyqaralyq ǵylymı-tájirıbelik konferentsııa ótedi.
Qazaq memlekettik qyzdar pedagogıkalyq ýnıversıtetinde ótetin bul sharany Bilim jáne ǵylym mınıstrliginiń qoldaýymen joǵary oqý orny qalalyq tilderdi damytý, muraǵattar jáne qujattama basqarmasymen birlesip uıymdastyryp otyr. Konferentsııa QR Joǵary mektep ǵylym akademııasynyń akademıgi, QR UǴA korrespondent múshesi, QR Jaratylystaný ǵylymdary akademııasynyń akademıgi, fılologııa ǵylymdarynyń doktory, professor Seıilbek Isaevtyń 75 jyldyǵyna arnalýda.
S. Isaev 1938 jyly Reseıde ómirge kelip, 1999 jyly Qazaqstanda dúnıeden ótken bolatyn. Omby pedagogıkalyq ýchılışesin, Qazaq memlekettik ýnıversıtetin bitirgen ol 1962-1988 jyldary QR ǴA Til bilimi ınstıtýtynyń kishi ǵylymı qyzmetkeri jáne Qazaq memlekettik qyzdar pedagogıkalyq ınstıtýtynyń aǵa oqytýshysy, dotsenti, dekany, kafedra meńgerýshisi qyzmetterin atqarǵan. Al 1989-1999 jyldar aralyǵynda ózi ustazdyq qyzmet jasaǵan Qazaq memlekettik qyzdar pedagogıkalyq ınstıtýtynyń rektory bolyp, onyń ósip-órkendeýine zor úles qosty. Túrkitaný salasyn tereń zerttep, til bilimi negizin qalyptastyrýda eleýli eńbek etip, til bilimi salasynda eren eńbegi úshin beriletin Y.Altynsarın atyndaǵy medaldiń ıegeri boldy. Ǵalym qazaq ádebı tiliniń damý joldary, til tarıhy, qazaq tili grammatıkasynyń teorııalyq máselelerin keń kólemde zerttep, irgeli ǵylymı jobalardy iske asyrdy. Sondaı-aq 1966 jyly «Ǵylym» baspasynan jaryq kórgen «Qazaq tiliniń qysqasha etımologııalyq sózdigi» men 1967 jyly shyqqan 2 tomdyq «Qazaq tiliniń akademııalyq grammatıkasy» avtorlarynyń biri boldy.
