Almatyda «Bilim berý salasyna arnalǵan IT sheshimderdi oqytý boıynsha Ortalyq Azııalyq forým ótip jatyr

Microsoft kompanııasynyń uıymdastyrýymen ótip jatqan forýmǵa baǵdarlamalardy daıyndaýmen aınalysatyn kompanııalardyń jetekshileri, tehnıkalyq keńesshiler, marketıng, satylym salasyndaǵy mamandar men óńdep shyǵarýshylar, qyzmet kórsetý bólimderiniń qyzmetkerleri jáne dıstrıbıýterler qatysýda.

Eki kúndik forým barysynda bilim berý salasyna jańa aqparattyq tehnologııalardy engizý máseleleri, Microsoft-tyń áriptestik strategııasy, birqatar ónimderi men kontentpen jumys jasaýǵa jáne bilim berý mekemelerine arnalǵan sheshimder, sonymen qatar, keshendik sheshimder men akademııalyq lıtsenzııalaý baǵdarlamalary qaralyp, talqylanbaq.

«Áriptestik forýmdar dástúrli is-sharamyz, degenmen, bul jyly forým tuńǵysh ret tolyǵymen bilim berý salasyna - otandyq IT kompanııalardyń basqa deńgeıge ótýine, óziniń damýy úshin jańa múmkindikter men perspektıvalar tabýyna bolatyn osy saladaǵy jetekshi tehnologııalarǵa arnalyp otyr. Bul oraıda, Qazaqstanda bilim salasyna jańa tehnologııalardy engizýge úlken kóńil bólinip otyrǵandyǵyn atap ótkim keledi», dedi Microsoft kompanııasynyń bilim berý sektorymen jumys isteý jetekshisi Janar Rahymjanova. Onyń aıtýynsha, 2011-2020 jyldarǵa bilim salasyn damytýǵa arnalǵan Memlekettik joba boıynsha 2015 jylǵa deıin bilim berý mekemeleriniń 90 paıyzy elektrondyq bilim alýdy qoldanýy qajet. «Ol maqsatqa jetýimiz úshin ınfraqurylymdy damytyp, baǵdarlamalyq sheshimderdi quryp, muǵalimderdi daıyndap, sandyq bilim resýrstaryn jasap shyǵýymyz kerek», dep atap ótti Janar Rahymjanova.

Onyń sózine qaraǵanda, elimizdegi mektepterdiń 98 paıyzy ınternetpen qamtamasyz etilgen. «Onyń úshten biri joǵary jyldamdyqpen jumys isteıtin ınternetke ıe. Aýyldyq jerler qaladan qalyspaı kele jatqanymenen kóptegen kompıýterler eskirip, aýystyrýdy qajet etip otyr», dedi ol.