Almatyda bilim berý qyzmetkerleriniń tamyz keńesi ótti
ALMATY. Tamyzdyń 25-i. QazAqparat /Názıra Eleýhan/ - Búgin Almatydaǵy Abaı atyndaǵy opera jáne balet teatrynda "Qazaqstan Respýblıkasynyń bilim berý júıesin qazirgi zamanǵy damytý strategııasy: jańa talaptar, jańa múmkindikter" degen taqyrypta bilim berý qyzmetkerleriniń tamyz keńesi bolyp ótti,
dep habarlaıdy QazAqparat.
Qala ákimi Ahmetjan Esimovtyń jáne QR Bilim jáne ǵylym vıtse- mınıstri Mahmetqalı Sarybekovtyń qatysýymen ótken jıynǵa aýdan ákimderi, qaladaǵy iri joǵary oqý oryndarynyń rektorlary, jergilikti atqarýshy organdar, qalalyq mekemelerdiń basshylary, bilim basqarmasy, aýdandyq bilim bólimderiniń qyzmetkerleri, bilim berý uıymdarynyń birinshi basshylary, qoǵamdyq uıymdar men múddeli vedomstvolardyń ókilderi, sonymen qatar ardager ustazdar men jas mamandar qatysty.
Keńes qaladaǵy úzdik pedagogıkalyq ujymdar men muǵalimderdiń ozyq tájirıbelerin nasıhattaıtyn "Bilim sapasyn basqarý" atty kórmemen jáne "2009-2010 oqý jylynyń qorytyndylary" atty fılmniń kórsetilimimen ashyldy.
Ashylý saltanatynda sóz sóılegen QR Bilim jáne ǵylym vıtse-mınıstri Mahmetqalı Sarybekov: "Mekteptiń basty tulǵasy, mekteptiń júregi - ustaz-muǵalimder. Biz úshin mektep bilim men tárbıeniń ortasy, keleshektiń ashar paraǵy, urpaqtar sabaqtastyǵynyń bir kýási. "Mektep - bul ómir qaqpasy, ol qaqpadan ár adam ótedi", dep Sýhomlınskıı aıtqandaı, árkim ol joldan ár túrli ótedi. Onyń qalaı ótetindigi ustazdar qaýymyna baılanysty. Shákirttiń qasynda kim turady, kim qandaı baǵyt-baǵdar beredi, kim qandaı aqyl-keńes aıtady bári soǵan baılanysty. Olaı bolsa, qazirgi tańda mektepke bilimdi, Ahmet pen Maǵjannyń pedagogıkasyn sýsyndaǵyn, jańa oqý ádistemeleri men tehnologııalarynan habary bar, shákirtin básekelestik keńistigine shyǵara alatyn sizderdeı bilimdi mamandar qajet", dep atap ótti.
Keńes barysynda Almaty qalasy bilim basqarmasynyń bastyǵy Raıhan Shımasheva sońǵy bir jylda qaladaǵy bilim berý salasynda atqarylǵan jumystardy qorytyndylady.
Keńeste sóz alǵan ákim bilim berý salasynda aldaǵy jyldary qolǵa alynǵaly otyrǵan sharalarǵa toqtala kele, «Mekteptiń gúldengeni- qalamyzdyń gúldengeni» qalalyq baıqaýdyń nátıjeleri boıynsha 6 bilim berý uıymdaryna, jalpy bilim beretin pánder boıynsha halyqaralyq, respýblıkalyq olımpıadalar men ǵylymı jarystardyń jeńimpazdaryn daıyndaǵan 78 ustazdy marapattap, qala ákiminiń syıaqysyn tabys etip, turǵyn úı kezeginde turǵan 3 ustazǵa páterlerdiń orderlerin tabys etti. Sonymen qatar, qalanyń úzdik pedagogtary QR Bilim jáne ǵylym mınıstrliginiń tósbelgilerimen jáne Almaty qalasy ákiminiń Qurmet gramotalarymen marapattaldy. Keńeste sondaı-aq, bilim berý salasynyń ardagerleri de marapattaldy.
Jıynnyń plenarlyq májilisi "Almaty - meniń qalam" atty kontserttik baǵdarlamamen aıaqtaldy. Kontsert barysynda bilim salasynyń qyzmetkerlerin elimizdiń óner qaıratkerleri de quttyqtady.
