Almatyda bilim alyp jatqan sheteldik jastar Qazaqstannyń táýelsizdik kúnin atap ótti
ALMATY. 16 jeltoqsan. QazAqparat - Almatydaǵy ál-Farabı atyndaǵy Qazaq ulttyq ýnıversıtetinde oqyp jatqan sheteldik stýdentter arasynda QR Táýelsizdigi kúnine oraı «Táýelsizdik tańym» dep atalatyn merekelik shara ótti.
Joǵary oqý ornyna deıingi bilim berý fakýltetiniń daıyndyq kafedrasynyń oqytýshysy Jibek Ibraımovanyń aıtýynsha, bul sharanyń basty maqsaty - ózderiniń tarıhı Otanynan jyraqta ósken qazaq dıasporasy ókilderine, Prezıdent bastamasymen bilim alyp jatqan aýǵan jastaryna Qazaqstan Respýblıkasynyń ótkeni men búginin tanystyrý. Qazirgi tańda respýblıkadaǵy bul jetekshi joǵary oqý ornynyń daıyndyq bóliminde 150 adam oqyp jatyr.
«Bul keshte tyńdaýshylar «Táýelsizdik kúni», «Jeltoqsan oqıǵasy» jaıly júrek tolqytar, mándi de maǵynaly óleń-jyrlar oqydy. Máselen, Іlııa Marhabbat: Táýelsizdik týy máńgi jelbirep, Táýelsizdik dese júrek eljirep. Qyrshynnan qıylǵan jastardy, Eske alaıyq jeltoqsandy eljirep! - dese, Janar Esenǵazy: Joımaǵan ǵasyrlardan qasıetin, ardaqtap uly baba ósıetin. Jas urpaǵy Otannyń biz bolamyz. Táýelsizdik aldynda bas ıetin - dep tebirendi. Sondaı-aq kúmbirlete tógilgen kúı, sharyqtata shyrqalǵan ásem ánder, bári de tól merekemizge baǵyttaldy. Qazaqtyń ulttyq bılerimen qatar, túbi bir túrki elderiniń, qaraqalpaq, ózbek, horezm bıleri - yntymaǵy jarasqan táýelsiz elimizdiń tatýlyǵy men birligin pash etkendeı áser qaldyrdy», - deıdi J.Ibraımova.
