Almatyda bıletsiz júrgen 172 jolaýshyǵa aıyppul salyndy
ALMATY. QazAqparat - Almatyda qoǵamdyq kólikterde jol aqysyn «OŃAI» kartasy arqyly tólemegen 172 adamǵa aıyppul salyndy. Olardyń ishinde jolaýshylar, júrgizýshiler jáne kondýktorlar da bar.
Jolaýshylarǵa 4,2 myń teńge kóleminde aıyppul salynady, dep habarlaıdy «Almaty qalalyq kólik holdıngi» JShS-nyń baspasóz qyzmeti.
«Bıletsiz júrgen jolaýshylardy anyqtaý jumystary kúndelikti kúsheıtilgen rejimde júrgiziletin bolady. Jol aqysy, tikeleı jolaýshy tasymaldaýshy kompanııalardyń esep-shotyna kelip túsedi, al bul, qalada qoǵamdyq kólik jelisiniń sapasyn arttyrady.
11-17 qańtarda aralyǵynda «OŃAI» elektrondy kólik kartasy arqyly 175,4 mln teńgege 2,7 mln tranzaktsııa jasalǵan. Al eger jolaýshylardyń barlyǵy birdeı jol aqysyn der kezinde tólep tursa, tasymaldaýshy kompanııalardyń esep-shotyna kelip túsetin qarjynyń kólemi arta túsedi», - delingen habarlamada.
Sonymen qatar, «OŃAI» elektrondy júıesi jolaýshylar legin durys jáne tıimdi júrgizý úshin naqty derekter alýǵa, qoǵamdyq kólikterdiń baǵdarlyq jelisin jolaýshylarǵa yńǵaıly etip qalyptastyrýǵa jáne jol aqysyn kóleńkeli aınalymnan shyǵarýǵa múmkindik beredi. Bul jerde jolaýshylardyń adal nıettiligine kóp nárse baılanysty.
18 qańtarńa deıin 705,3 myń «OŃAI» kólik kartasy satyldy jáne taratyldy. Alaıda, búgingi kúni karta ıeleriniń tek 40 paıyzy ǵana tólem jasaǵan.
«Al eger de jolaýshylardyń barlyǵy birdeı jol aqysyn zańdy jolmen tóleıtin bolsa, onda qaladaǵy kólik salasyn reformalaý qarqyndy túrde júrgiziler edi», - delingen habarlamada.
Osy maqsatta 18 qańtarynan bastap, «Almaty qalalyq kólik holdıngi» JShS qalalyq ІІD birlesip, barlyq aýdandardaǵy qoǵamdyq kólikterde bıletsiz júrgen jolaýshylardy anyqtaý boıynsha reıdter júrgize bastady.
