Almatyda bılıardtan «Air Astana Open - 2010» týrnıri boldy

«Eır Astana» áýekompanııasynyń uıymdastyrýymen ótken jarysta otandyq 28 BAQ ókilderiniń komandalary básekege tústi. Dúbirli doda elimizdegi osy sport túrin nasıhattaý jáne jýrnalıster qaýymnyń basyn qosyp, qarym-qatynasty nyǵaıtý maqsatynda ótkizildi.

Saıys barysynda eń myqty oıynshylar anyqtalyp, olar uıymdastyrýshy tikken baǵaly júldelerge ıe boldy. Birinshi orynǵa Asyl Ábenov pen Abdýhalıl Jalılov quraǵan «Vechernıı Almaty» gazetiniń toby taban tiredi. 2-oryn «Gala TV» komandasyna buıyrdy. Al 3-oryndy «Qazaq ádebıeti» gazeti ıelendi. Júldegerler dıplomdarmen jáne Kýboktarmen marapattaldy. «Eır Astana» áýekompanııasy 1-oryndy alǵan oıynshylarǵa Almaty - Kýala Lýmpýr - Almaty baǵyty boıynsha, 2-oryn alǵandarǵa Almaty - Sankt Peterbor - Almaty baǵyty jáne 3-oryn alǵandarǵa Almaty - Delı - Almaty baǵytyndaǵy ekonom klastyń 2 bıletin tapsyrdy.

Sonymen qatar, týrnırde qatarlas ótken «Air Astana Open 2010 hanymy» ataǵyn «Qazaqstan» arnasynyń ókili Aıgúl Aqsambıeva utyp aldy.

Jarysty bılıard sportynen QR bas tóreshisi, halyqaralyq sanatynyń tóreshisi Roman Buzyrqojaev basqarǵan 4 adamnan turatyn tóreshiler alqasy júrgizdi.

Esterińizde sala keteıik, ulttyq áýe tasymaldaýshy bılıardtan týrnırdi osymen ekinishi ret uıymdastyryp otyr. 2008 jyly ótken alǵashqy jarystaǵy 25 komanda arasynda «Qazaq ádebıeti» gazetiniń ókilderi Janarbek Áshimjan men Baqyt Bedelhan top jarǵan bolatyn.