Almatyda bılıard oıyny barysynda jábirlenýshini abaısyzda uryp óltirgen adam 8 jylǵa sottaldy
ALMATY. QazAqparat - Keshe Almaty qalasynyń №2-shi Bostandyq aýdandyq sotynda A. E. esimdi azamatqa qatysty QR Qylmystyq kodeksiniń 106-babynyń 3-shi tarmaǵy boıynsha (Densaýlyqqa qasaqana aýyr zııan keltirý, abaısyzda jábirlenýshiniń ólimine ákep soqqan qylmystyq is-áreketter) qylmystyq isti qaraý aıaqtaldy. Bul týraly Almaty qalalyq sotynyń baspasóz qyzmetinen habarlady.
Sot sheshimimen A. E. QR Qylmystyq kodeksiniń 106-babynyń 3-shi tarmaǵynda qarastyrylǵan qylmystardy jasaǵan dep tanylyp, 8 jylǵa bas bostandyǵynan aıryldy. Sottalýshy endi jazasyn jalpy rejimdegi túzetý kolonııasynda óteıtin bolady.
Sottyń anyqtaǵanyndaı, sottalýshy A. E. bılıard klýbyna kelip, onda jábirlenýshimen kezdesedi, sóıtip ony bılıard oınaýǵa shaqyrǵan. Uzaqqa sozylǵan oıynnan keıin, ekeýiniń arasynda daý týyndaıdy. A. E. qasaqana áreket jasap, oń qolynyń judyryǵymen jábirlenýshiniń sol jaq betinen urady. Jábirlenýshi aýyr soqqydan edenge qulap túsip, esinen tanyp qalady. Onyń ólip ketýi múmkin ekendigin sezgen A. E. oǵan kómek kórsetýge tyrysyp, jedel járdem brıgadasyn shaqyrdy. Jábirlenýshi aýrýhanaǵa jatqyzyldy. Alaıda, ol tórt kúnnen keıin esin jımaǵan kúıi kóz jumdy.
Sot úkimi áli zańdy kúshine engen joq.
