Almatyda bılıard, kólik jýý jáne kompıýterlik klýbtarǵa kúsheıtilgen monıtorıng júrgizilýde
ALMATY. QazAqparat – Koronavırýs ınfektsııasynyń juqtyrý jaǵdaılarynyń tirkelip jatqanyn eskere otyryp, Almaty qalasynyń ákimdigi megapolıs aýmaǵynda karantındik is-sharalardyń saqtalýyn baqylaý boıynsha kúsheıtilgen jumys júrgizýde, dep habarlaıdy QazAqparat tilshisi.
Qalalyq ákimidiktiń baspasóz qymetiniń málimetinshe, barlyǵy 26 monıtorıng top jumys isteıdi, olardyń quramyna aýdandyq ákimdikterdiń, jergilikti polıtsııa qyzmetiniń qyzmetkerleri, «Atameken» UKP ókilderi jáne aýdandyq taýarlar men qyzmetterdiń sapasy men qaýipsizdigin baqylaý basqarmalarynyń mamandary kiredi.
13-14 qazanda Almaty qalasy boıynsha 237 monıtorıngtik is-shara ótkizildi, Almaty qalasynyń bas memlekettik sanıtarlyq dárigeriniń 15.08.2020 jylǵy № 56 qaýlysymen belgilengen jumys rejımi buzylǵan 75 nysan, sondaı-aq, juqtyrý qaýpi joǵary bolǵandyqtan ýaqytsha tyıym salynǵan nysandardyń qyzmet kórsetý faktileri anyqtaldy.
Buzýshylyqtar kelesi nysandarda anyqtaldy: Pýshkın kóshesi, 25 mekenjaıyndaǵy (Medeý aýdany) «Ggg gamer» kompıýterlik klýby qyzmetine tyıym salý; «Bochonok» meıramhanasy, «Almaty doner» dámhanasy, «Dýblın» ınternet kafesi (Bostandyq aýdany); «Doner Kebab» dámhanasy, «Hmel» syra bary, «Samal» dúkeni, «Stella» avtokólik jýý orny (Jetisý aýdany); 8 sh.a. 37 V úı mekenjaıyndaǵy «Abyroı» dámhanasy, «Bison» avtokólik jýý orny, «Akvarıým» kesheni (avtojýý, bılıard, kafe), «Eden» dámhanasy, «Gosushi» dámhanasy (Áýezov aýdany); «Aıym» dúkeni, «Aslan» shashtarazy, «Monıka» dúkeni (Túrksib aýdany); «Kazahınstrah» saqtandyrý kompanııasy, «M-lombard», «Sýshı Pıtstsa» dámhanasy, «Afiyet» dámhanasy, «Almaly» dúkeni (Alataý aýdany).
Jetisý jáne Alataý aýdandarynyń mobıldi toptarynyń ókilderi negizgi buzýshylyqtardyń arasynda dezınfektsııalyq kilemsheniń, teplovızorlardyń, qyzmetkerlerdi tirkeý jýrnalynyń bolmaýy, maskalyq rejım men áleýmettik qashyqtyqty saqtamaý, kelýshiler sanynyń artýy jáne t. b. bar ekenin jetkizdi.
Monıtorıng barysynda barlyq sanıtarlyq-epıdemııalyq talaptardy saqtaýdyń mańyzdylyǵy týraly túsindirý jumystary keńinen júrgizilip jatqanyn atap ótken jón.
Mysaly, Jetisý aýdanynyń aýmaǵynda 2020 jylǵy 9-14 qazan aralyǵynda 124 nysanda sanıtarlyq-epıdemııalyq talaptardy qatań saqtaý boıynsha túsindirý jumystary júrgizildi.
Almaty ákimdigi koronavırýstyń yqtımal jańa tolqynynyń bastalýyna baılanysty barlyq qaýipsizdik sharalaryn saqtaýdyń mańyzdylyǵyn eske salady.
«Qoǵamdyq oryndarda, adamdar kóp júretin kóshelerde, sonyń ishinde qoǵamdyq kólikte maska kııý vırýstyń aýamen taralýyna kedergi bolady. Epıdemıologtardyń aıtýynsha, barlyq adamdardyń maskalardy qoldanýy qoǵamda yqtımal naýqastan aýrýdy 90% - ǵa deıin juqtyrý qaýpin azaıtady. Qoldy óńdeý úshin antıseptıkterdi de qoldaný qajet; múmkindiginshe - adamdar kóp jınalatyn jerlerge barmaǵan jón»,– dep atap ótti ákimdik.
