Almatyda Bıbigúl Tólegenovanyń HІІ halyqaralyq vokalıster konkýrsy bastaldy
Uıymdastyrýshylardyń aıtýynsha, baıqaý qyrkúıek aıynyń 11-i men 17-si aralyǵynda Abaı atyndaǵy ulttyq akademııalyq opera jáne balet teatrynda ótedi.
«12 qyrkúıek kúni irikteý týryna tyńdaý boldy. Al 11-i kúni Abaı atyndaǵy opera jáne balet teatrynda Bıbigúl Tólegenovanyń HІІ halyqaralyq vokalıster konkýrsynyń ashylý saltanaty ótti. Kesh qonaqtary men konkýrsqa qatysýshylaryna Qazaqstannyń jáne KSRO Halyq ártisi, Sotsıalıstik Eńbek Eri, Qazaqstannyń jáne KSRO Memlekettik syılyqtardyń laýreaty, akademık Bıbigúl Tólegenova ystyq lebizin jetkizdi»,- dep atap ótti uıymdastyrýshylar.
Lıýksembýrgtan arnaıy kelgen ádil qazy múshesi, halyqaralyq konkýrstardyń laýreaty, álemdik opera hanshaıymy Elena Zarembanyń aıtýynsha, Bıbigúl Tólegenovanyń halyqaralyq vokalıster konkýrsy – álemdik jáne joǵary deńgeıli jastar úshin eń klassıkalyq mýzyka baıqaýy.
«Bul baıqaý jańa talanttarǵa jol ashady. Qatysýshylarǵa ózderiniń shyǵarmashylyq áleýetin pash etýge múmkindik beredi. Kásibı tájirbıelik turǵyda ózderiniń sheberlikterin shyńdaıtyn, klassıkalyq ónerde joǵary deńgeıge shyǵýǵa jol ashatyn alań, al óner jolyn jańa bastap kele jatqan oryndaýshylarǵa alǵashqy kásibı alań deýge bolady», - deıdi ol.
Baıqaýǵa qatysýǵa Qazaqstannyń barlyq óńiri men 11 elden 73 ónerpaz nıet bildirdi. Talap boıynsha konkýrsqa 1988 jyldyń 1 qazanynan keıin jáne 2004 jyldyń 1 qazanyna deıin dúnıege kelgender qatysady.
Baıqaýda qatysýshylar irikteý jáne fınaldyq týrlardan ótedi. Barlyq tyńdaý ashyq ótkiziledi. Oryndaýshylardyń qatysý rettiligi jerebe arqyly anyqtalyp, baıqaý aıaqtalǵansha saqtalady. Fınalǵa 14 qatysýshy joldama alady.
Qatysýshylardyń ónerin joǵary mártebege ıe kásibı qazylar alqasy baǵalaıdy. Olardyń qatarynda Italııa, Lıýksembýrg, Chehııa, QHR jáne Qazaqstannyń álemdik deńgeıdegi opera óner maıtalmandary bar.
HII Halyqaralyq vokalıster konkýrsynyń qazylar alqasynyń tóraǵasy KSRO jáne Qazaqstannyń Halyq ártisi, Sotsıalıstik Eńbek Eri, KSRO jáne Qazaqstannyń Memlekettik syılyqtarynyń laýreaty, akademık Bıbigúl Tólegenova.
