Almatyda Bıbigúl Tólegenovanyń 90 jyldyq mereıtoıy atap ótildi
ALMATY. QazAqparat – Almatyda Sotsıalıstik Eńbek Eri, KSRO Halyq ártisi, KSRO Memlekettik syılyǵynyń laýreaty Bıbigúl Tólegenovanyń mereıtoıy saltanatty túrde atap ótildi, dep habarlaıdy QazAqparat tilshisi.
Abaı atyndaǵy memlekettik akademııalyq opera jáne balet teatryna Bıbigúl Tólegenovanyń týystary, saıası jáne qoǵam qaıratkerleri, sondaı-aq mádenıet pen óner ókilderi jınaldy.
Qazaqtyń bulbuly atanǵan Bıbigúl Tólegenovany Almaty qalasynyń ákimi Baqytjan Saǵyntaev qutyqtady.
«Búgin — barshamyz úshin erekshe kún. Sebebi ómiri ónerge, óneri ómirge aınalǵan aıaýly Bıbigúl apaıymyz qýanyshyn bizben bólisip otyr. Qazaqtyń kásibı án óneri degende bizdiń oıymyzǵa birden Kúlásh Baıseıtova, Roza Baǵlanova, Ermek Serkebaev jáne búgingi toı ıesi Bıbigúl Tólegenova oralady. Tabıǵı talanty men tynymsyz eńbeginiń arqasynda ónerdiń shyńyna shyqqan, halqynyń shynaıy mahabbatyna bólengen Bıbigúl apamyzdy osydan 10 jyl buryn Pavlodar oblysynyń ákimi bolyp otyrǵan kezimde quttyqtap, batasyn alyp edim. Búgin arý Almatynyń sol kisige degen ystyq yqylasyn jetkizý baqyty taǵy da maǵan buıyryp otyr. Men úshin bul erekshe qýanyshty sát. Búgingi toı tutastaı qazaq óneriniń merekesi. Toı barshańyzǵa qutty bolsyn!» - dedi Baqytjan Saǵyntaev.
Bıbigúl Tólegenovanyń 90 jyldyǵyna arnalǵan shyǵarmashylyq keshke QR Mádenıet jáne sport mınıstri Aqtoty Raıymqulova da qatysyp, júrekjardy quttyqtaýyn jetkizdi.
«Osydan týra 19 kún buryn elimizdiń ordasy, Nur-Sultan qalasynda tamasha kesh berdińiz. Mádenıet jáne sport mınıstrligi uıymdastyrǵan «Astana Opera» teatrynda ótken merekelik sharada qazaqstandyq tanymal opera ánshileri, izbasarlaryńyz, Bıbigúl Tólegenova baıqaýynyń laýreattary án shyrqap, mereıińizdi tasytty. Árdaıym osylaı abyroı bıiginde bolyńyz, Siz asqar shyńǵa shyǵýdyń, shyqqan soń sol bıikte máńgilikke qalýdyń ozyq úlgisin kórsetken birtýar talant ıesisiz! Siz taǵdyr talaıyńyzda san túrli qıyndyqty kórgen, qandaı sátsizdikti bolsyn parasattylyqpen, aqylmen eńsere bilgen kemeńger ańyz adamsyz. Endi sol beınetińizdiń zeınetin kórip, ortamyzda jón silter, baǵdar berer aqylmanymyz bolyp aman júrińiz»,- dedi Aqtoty Raıymqulova.
